Кемдер аны Борчак буларак белә, кем өчендер ул тамада, студентлары аңа Рәзил Рәисович дип эндәшә. Әле күптән түгел генә «җаным» дип эндәшүчесе дә табылды. Рәзил белән без дә сөйләшеп, яңалыкларын барладык.
– Күптән түгел генә башлы-күзле булдың. Әле гаилә тормышының нечкәлекләрен өйрәнеп кенә киләсеңдер.
– Гаилә тормышы бик үзенчәлекле икән ул, кызык-мызыклар да булгалый. Тормыш иптәшем Элинаны беренче тапкыр әти-әнием белән таныштырырга алып кайткач, 15 банка чия компоты яптык.
– Ул хәлләр «Инстаграм»дагы сәхифәңдә чагылыш табачакмы?
– Таба башлады инде. Менә шул компот каплаганнарны төшереп, «Тик-Ток» һәм «Инстаграм»га керттем. «Вишневые будни» дип исемен дә куйдым.
– Элегрәк син төрле фильм, мультфильмнардан өзекләрне кызык итеп тавышландыра идең. Соңгы арада андый видеолар күренми.
– Ялкаулыктыр. Аннан соң, андый видеоларны «Инстаграм» яратмый, кабул итми башлады. Лайклар, караучылар саны кимеде. Шуңа да мин яңа «Будни…» дигән форматта төшерәм. Барыбызга да таныш хәлләрне халык ярата, кызыксынып карый.
– Үзеңне популяр дип уйлыйсыңмы?
– Интернетта үземне популяр дип санамыйм. Минем өчен блогер булу – хобби гына.
– Соңгы арада татар блоглары русчага күчә башлады. Син дә еш кына язылучыларыңа русча мөрәҗәгать итәсең бит.
– Мин моны татарчаны онытып, тулысынча русча сөйләшер өчен түгел, ә чит җирләрдә яшәгән татарларны җыеп, татар теленә кызыксындыру уятыр өчен эшләдем. Телебезне пропагандалауның бер чарасы бу. Минем сәхифәмдә «Уроки татарского мастерства» дигән рубрика бар, татар сүзләрен, аларның төрле очракларда кулланылышын өйрәтәм. Шаян формада, әлбәттә. Хәзер «Тик-Ток» алгы планга чыкты, шуңа да видеоларны күбесенчә рус телендә төшерәм.
– Киләчәктә блогерлык белән шөгыльләнергә уйлыйсыңмы? Бүген табыш китерәме ул сиңа?
– Ул һәрвакыт минем хобби гына булды, хәзер дә шулай. Гаиләле булгач, хәзер күп вакытымны якыннарыма багышлыйм.
– Син бит әле – оста баянчы, алып баручы да. Боларның күңелеңә кайсы якынрак?
– Аларның барысы да якын. Хәзергә бөтенесен берьюлы эшлим. Көллияттә баянчыларга белем бирәм, туйлар алып барам, ә видеоларны сирәк-мирәк кенә төшерәм.
– Блогерлар арасында дуслык бармы?
– Бар. «Кызык-мызык» (Илназ Габидуллин), «Булат Браво» (Булат Абдрахманов), «Татар малай» (Ринат Галиәхмәтов), «Кишер» (Рәдис Гарипов), Рәмис Гыйлметдинов («Дневник татарина») белән бик яхшы аралашып торабыз. Тик алар шалтыратканда, мин җавап бирәм, мин шалтыратканда – алар алмый.
Телеграмда безнең каналга кушылыгыз: https://t.me/vatantat