Татарстан Санлы үсеш министрлыгы, Сәламәтлек саклау министрлыгы белән берлектә, республикада яшәүчеләргә COVID-19 инфекциясе таралу буенча киңәш-табыш алу өчен булдырылган “Кайнар линия” эшен камилләштергән һәм көчәйткән.
Шулай итеп, бездә инде март аенда ук булдырылган СOVID-19 мәсьәләләре буенча күп каналлы “Кайнар линия” бүген яңа форматта эшли башлаган. Республикада яшәүчеләр, 8 800 222 59 00 номерын җыеп, коронавирус инфекциясе турында көн кадагына суга торган мәсьәләләр буенча, дарулар белән тәэмин итү буенча һ.б. киңәш-табыш ишетү мөмкинлеге алачак, дигән сүз бу.
“Кайнар линия” тәүлек әйләнәсе эшли. Шалтыратучыларга ике телдә: рус һәм татар телләрендә җавап бирелергә мөмкин.
Моннан тыш Татарстан халкына инде таныш “кыз” – Лилия дигән тавыш ярдәмчесе дә үзенең эшен дәвам итәчәк. Робот-телефон коронавирус, COVID-19 инфекциясенең билгеләре, республикада гамәлдә булып килүче чикләүләр турында соаруларга җавап бирәчәк. Робот “карамагындагы” сорау-җаваплар исемлеге әле тагын да киңәйтеләчәк.
“Үзизоляция режимы чорында санлы пропусклар сервисының эше буенча “Кайнар линия” булдырган идек. Ул үзенең әйбәт кенә нәтиҗәсен күрсәтте. “Кайнар линия” эшләгән чорда операторлар 200 меңнән артыграк сорауга җавап бирде. Хәзерге вакытта сәламәтлек саклау системасы максималь киеренкелектә эшли. Шуңа күрә республикада яшәүчеләрнең коронавируска бәйле барлык сорауларына тиз генә җавап табуы мөһим. Моның өчен без Татарстан Сәламәтлек саклау министрлыгы белән берлектә махсус “Кайнар линия”не эшләтеп җибәрдек. Операторлар штатын арттырдык. Шулай ук республикабызда яшәүчеләргә, операторның трубканы алуын көтеп тормыйча гына, үзләрен борчыган сорауларга җавапны тизрәк ишетү мөмкинлеге тудыру өчен, робот-телефонның белемнәрен үстерүне дә планлаштырабыз”, – ди Татарстан санлы үсеш министры Айрат Хәйруллин.
