Өч кыз туганның иң тыйнагыдыр ул. Ләйсән Гыймаева һәм Булат Бәйрәмовның уртанчы кызлары, гаиләдә өч җырчы була торып та, роботлар һәм җәнлекләр белән кызыксына икән.
– Өч кызлы гаиләдә төрле чаклар буладыр?
– Рәхәт чаклары күп: апам белән бер мәктәпкә йөрибез, кирәк чакта, бер-беребезгә ярдәм итәбез. Кайвакытта талашабыз да инде. Ләкин барыбер яратам мин аны. Сеңлемне дә яратам.
– Зәйнәпне кем күбрәк ярата соң: синме, апаңмы?
– Икебез дә бертигез яратабыз. Әти белән әни эш буенча китсә, Зәйнәпне икебез алып калабыз. Апамның да эше булса, минем янга әбиебез килә.
– Зәйнәп тугач, өй тирәсендә эшләр арткандыр. Әниеңә булышасызмы?
– Әлбәттә. Күбрәк Зәйнәпне карашабыз. Өйләр җыештырырга, аш бүлмәсендәге вак эшләр белән дә ярдәм итәбез.
– Әти-әниең дә, апаң да җырлый, ә син нәрсәләр белән кызыксынасың?
– Миңа роботлар, конструкторлар ошый, рәсем ясарга яратам. Сеңлем Зәйнәп белән гел рәсем ясауда без.
– Киләчәктә алар кебек җырчы яки алып баручы булырга теләмисеңме?
– Юк, оялчан мин. Өйдә генә җырлыйм. Әти-әниемә карап, бу һөнәрнең авырлыгын да күрәм. Минем, үскәч, дизайнер яки архитектор буласым килә.
– Моннан тыш, нинди зур хыялың бар?
– Приютлардан күп итеп җәнлекләр алып, аларны тәрбиялисем килә. Ләкин минем алардан аллергия икән, әни шулай дигән була. Ә чынлыкта, әни белән апам хайваннарны бик яратып бетерми, шуңа күрә әлегә рөхсәт юктыр.
– Җәнлекләрнең кайсын ныграк яратасың?
– Хамелеон бик ошый.
Әңгәмәдәш – Лилия Гыймазова