100 эшмәкәр яшь фермер мәктәбен узган

Татарстан Авыл хуҗалыгы һәм азык-төлек министрлыгы, Аграр яшьләр берләшмәсе ярдәмендә, илнең 8 төбәгеннән әле яңа гына эш башлап җибәргән йөздән артыграк фермер интернет аша яшь фермер мәктәбендә белемнәрен чарлаган. Укыту-өйрәтү “Агрополия” платформасында оештырылган.

Шулай итеп, яшь фермерлар өч көн дәвамында кече хуҗалыкларга дәүләт ярдәме программалары, гаилә терлекчелек фермаларына субсидияләр турында бик күпне белүгә ирешкән, шулай ук документлар тутыру серләренә, фермер хуҗалыкларына салым салу мәсьәләләренә төшенгән.
Ә инде укыту-өйрәтүнең практика өлешендә фермерлар интернет аша Чүпрәле районында мәрмәр ит җитештерүче Ренат Айзятов фермасында, Биектау районында Латыйповларның роботлаштырылган сөтчелек фермасында, шулай ук “Лукоз Саба”, “Кама винограды” предприятиеләрендә “булып кайткан”.
“Онлайн-экскурсия бик ошады. Шәхсән минем үземә мәрмәр ит җитештерүче “Айзятов” фермер хуҗалыгы тәҗрибәсе бик тә кызыклы тоелды. Мондый экскурсияләр теориянең асылына тирәнрәк төшенү, үз хуҗалыкларыбызны үстерүне дәвам иттерүгә карата кызыксыну тудыру мөмкинлеге бирә. Казахстанда органик чиста ит җитештерү белән шөгыльләнәм. Миңа сезнең республикада әлеге производстводагы эшләрне күзәтү бик файдалы булды”, – ди Казахстаннан яшь фермер Гөлмирә Морзакаева.
Укыту-өйрәтүнең теоретик өлешендә исә яшь эшмәкәрләр республиканың профильле министрлыклары һәм ведомство вәкилләре белән очрашкан. Алар сөтчелек, итчелек, үсемлекчелек юнәлешендә бизнес-планнар язу мәсьәләләре, инвестицияләрнең нәтиҗәлелеге, шулай ук кече хуҗалыкларда җир мөнәсәбәтләре буенча фикер алышкан.
Уку курсы тәмамланганнан соң яшь фермерлар Казан дәүләт аграр университетының квалификация күтәрү турында таныклыгына ия булган, ә инде иң яхшы 20 фермер “Россельхозбанк”ның бушлай мәгариф программасына эләккән.


Фикер өстәү