Былтыр кысканга быел кычкырасы түгел, диләрме әле? “Болгар радиосы” Милли музыкаль премиясен оештыручылар да шушы сүзләрне исәпкә алган ахрысы.
Коронавирус дип тормаганнар: 2020 елның музыкаль нәтиҗәләрен 2021 елга чыгармаска булганнар. 12 декабрьдә әлеге премия сигезенче мәртәбә иң-иң дип табылган җырчыларга тапшырылачак. Тик тамашачы әлеге чараны бары тик телевизор, гаджет экраннарыннан күзәтә, радио ешлыктан гына тыңлый алачак. Оештыручылар журналистлар белән очрашып, быелгы премиягә бәйле кайбер серләрне ачты.
Премия кемгә?
Халык күңелендә үз урынын тапкан җырчыларны һәм җырларны барлап, алтын фондка кертү, иң-иңнәрне сайлау, легендар җырчыларның иҗатын саклау, яшь җырчыларны таныту. “Болгар радиосы” Милли музыкаль премиясенең максаты әнә шул. Елдагыча премия ияләре “Алтын йолдыз” белән бүләкләнәчәк. Алар арасында Фирдүс Тямаев, Илсөя Бәдретдинова, Ришат Төхвәтуллин, Зинира һәм Ризат Рамазановлар, Зәйнәб Фәрхетдинова, Алия Карачурина, Рифат Зарипов бар. Премияне җырның көй һәм сүз авторларына да тапшырачаклар. “Болгар радиосы” дулкыннарында иң еш соралган җырлар да “Алтын йолдыз” сыны белән бүләкләнәчәк дип вәгъдә итә оештыручылар.
“Иң лирик җырчы”, “Халык мәхәббәте”, “Иң затлы җырчы” – барлыгы 30га якын номинация. Ел саен “Татар эстрадасы легендасы”н билгелиләр иде – бу ел да искәрмә булмаячак. Оештыручылар әлегә бу исемне кемгә тапшырасын сер итеп саклый.
“Кеше килерме-юкмы, дип, куркып…”
Сигезенче мәртәбә тапшырылачак премия быел нәрсәсе белән истә калыр икән соң?
Чараның режиссеры – Алмаз Әкбәров, сценарий авторы – Альберт Шакиров. Оештыручылар сүзләренчә, телевидение, үзебездәге сәхнә “кухнясы” белнә яхшы таныш булган кешеләр белән эшләве отышлырак. Шуңа да читтән, кәттәләнеп, башка белгечләр чакырырга кирәкми дә.
Билгеле булганча, музыкаль бәйрәм “Пирамида” залында узачак. Әмма тамашачыларсыз. Әлеге чараны халык интернет киңлекләрендә, ТНВ, ТНВ-Планета каналларыннан карый, “Болгар радиосы” ешлыгыннан тыңлый алачак.
– Кеше килерме-юкмы, дип, куркып, шулай эшләргә булдык. Туры трансляция оештырылачак, – дип аңлатты “Болгар радиосы” генераль директоры Наилә Хәйдәрова.
Чараның продюсеры, алып баручысы, “Болгар радиосы” мөхәррире Илфар Кәримов тантана артистларыбыз өчен дә файдага гына булачак. Онлайн форматта булса да, ул аларга иҗат итү өчен этәргеч, илһам өстәячәк.
– Үз эчләренә бикләнеп ятмыйча, бәйрәм рухын, Яңа ел якынлашканын тойсыннар өчен, без моны уздырырга, икенче елга калдырмаска булдык. Ни дисәң дә, бу – еллык нәтиҗә һәм 2020 елның нәтиҗәләрен киләсе елда чыгарып булмас, дигән фикергә килдек, – диде ул.
Премияне тапшыру тантанасын гадәттәгечә Илфар Кәримов һәм Рөстәм Гайзуллин алып барачак. Аларның дуэтына гүзәл зат та өстәләчәк. Быел ул Зөлфия Шәрәфиева булачак. Зөлфия – Саба кызы, “Мисс Татарстана – 2017” титулы иясе, хәзерге вакытта Мәскәүдә яши. Журналистлар белән очрашу вакытында ул видеоэлемтә аша тоташып, премиягә карата үз фикерләре белән уртаклашты.
– Минем инде кайда гына чыгыш ясаганым юк, шулай да өйдә, татар телендә чыгыш ясау – бу аеруча мактаулы, – диде ул. Чарага бер атна кала, ул Татарстанга кайтачак. Татар телен бераз шомартып алырга кирәк икән. Оештыручылар әйтүенчә, Зөлфия тантанага бик җитди карый һәм әзерләнә.
Җырчылар ни ди?
Коронавируска рәхмәт әйтергә була икән. Илфар Кәримов сүзләренчә, пандемия радиога җибәрелгән музыкаль контент дәрәҗәсенә яхшы тәэсир иткән. Җырчылар сыйфатлырак җырлар иҗат итә башлаган. «Элек артистлар башта Яңа ел корпоративларында, аннары башка чараларда чыгыш ясый, шуңа күрә алар җәй айларында гына икешәр-өчәр җыр чыгара иде. Быел җырлар күбәйде һәм аларның сыйфаты да яхшырды», — ди радио мөхәррире.
Гөлсирин Абдуллина мондый премиядә катнашуны зур дәрәҗә һәм халык белән тагын да якынаю өчен сәбәп дип саный икән. Башкара торган җырларының да күбрәк сүзләренә, мәгънәсенә басым ясыйм, ди Ваһапов фестивале лауреаты.
Аның ире — Азат Абитов «Болгар радиосы» премиясен беренче тапкыр 22 яшендә алган икән. Шул вакытларны бигрәк тә хисләнеп искә алды җырчы. Азат белән Гөлсириннең иҗади уңышлары арасында бу премия — дүртенчесе икән инде.
Чулпан Гарифуллина
