Кышкы озын кичләрдә уңган хуҗабикәләр кул эшләре белән мәшгуль. Шуны истә тотып, бер-ике кичтә әзер була торган башлык белән снуд (түгәрәк шарф) бәйләү ысулын тәкъдим итәбез. Бик гади генә. Уң күз, сул күзне аерсаң, шул җитә.
Кирәк булачак: 200 грамм ярымйон җеп (калынрак), № 5,5 бәйләү энәсе (спица).
Башлык. Энәгә 54 күзәнәк җыеп, 8 рәттән торган резинка (2 уң, 2 сул күздән торган) бәйлибез. Шуннан соң бөтен башлыкны шәл бәйләме белән бәйлибез: 1 нче рәтне бәйләгәч, тигез итеп 8 күзәнәккә киметәбез, резинкадан 14 сантиметр киңлектә бәйләгәч – 11 күзәнәкне һәм резинкадан 16 сантиметр киңлектә бәйләгәч, 12 күзәнәкне бетерәбез.
Резинкадан 23 сантиметр киңлектә бәйләгәч, барлык күзәнәкләрне энәгә кертеп, җепне өзәбез (очын озын итеп калдырып). Җепне энәдәге барлык күзәнәкләр аша үткәреп, энәне тартып алабыз һәм очын тарттырып куябыз. Башлыкны ике яктан тоташтырып тегәбез.
Шарф. Энәгә 24 күзәнәк җыеп, шәл бәйләме белән бәйлибез. 50 сантиметр бәйләгәч, күзәнәкләрне бетерәбез. Шарф очларын бер-берсенә тоташтырып, тегеп яки брошь ярдәмендә эләктереп куябыз.
