Шоу-бизнес ишекләре кемнәргә ачылыр?

Май аенда башланып киткән “Яңа йолдыз” беренче телевизион вокаль проекты финалистларын киң җәмагатьчелеккә күрсәтергә әзер. Бу йолдызларның кайсысы озаграк янар? Ни өчен әлеге проектны Татарстан Президенты да хуплаган? Катнашучыларның кайсысын үз әнисе бәяләгән? Бу хакта проектның финалына багышланган матбугат очрашуында сөйләштеләр.

Быел “Барс Медиа Груп” компанияләр төркеме татар эстрадасы тарихында беренче телевизион вокаль шоу башлап җибәрде. Өч этаптан торган проектка 18 яшьтән 35 яшькәчә булган 300 кеше гариза җибәргән. Башкортостан, Удмуртия,  Пермь, Ульян, Түбән Новгород өлкәсе, хәтта Казахстан һәм Үзбәкстаннан да катнашырга теләүчеләр булган. 50 катнашучы беренче этапка үтсә, финалда 12 катнашучы гына чыгыш ясыячак.

13 декабрьдә исә майдан бирле “йолдыз” булырга өйрәнгән яшь башкаручылар татар эстрадасының танылган җырчылары белән бер сәхнәдә тамашачы алдында имтихан тотачак. Филармониядә Элвин Грей, Әнвәр Нургалиев, Филүс Каһиров, Эльмира Кәлимуллина һәм башка җырчылар яңа йолдызлар белән дуэтлар башкарачак, дип искәртте оештыручылар.

Кояш барда йолдыз күренерме?

Яңа исемнәр ачу максатыннан башланган проектның гала-концертында барыбызга да таныш артистлар да чыгыш ясый. Тамашачының кемне карарга килүе – әлегә сорау астында. Бу мәсьәләгә “Барс Рекордс”ның үсеш һәм инновацияләр юнәлеше буенча директоры Динә Гәрәева ачыклык кертте:

– Миңа калса, яшьләрнең билгеле җырчылар белән чыгыш ясавы – плюс кына. Аларның күбесе зур сәхнәгә тәүге тапкыр аяк басачак. Алай булмаган очракта да, яшь җырчыга, янында профессионал басып торса, күпкә җиңелрәк. Моннан тыш, бу бит алар өчен менә дигән мөмкинлек, – диде ул.

Динә Гәрәева белән катнашучылар да килеште. Ә менә кемнең кем белән җырлавын әлегә сер итеп саклыйлар.

12 финалистның өчесе – “Яңа йолдыз” бәйгесенең супер-финалистлары исеменә һәм 2021 елгы “Татар җыры” сәхнәсендә чыгыш ясау мөмкинлегенә ия булачак. Ә абсолют җиңүче киләчәктә “Барс Медиа” продюсерлык үзәге белән хезмәттәшлек итәчәк. Динә Гәрәева сүзләренчә, мондый бүләкләр – яшь җырчыларга югалып калмау өчен яхшы мөмкинлек.

Ярдәмне кемнән көткәннәр?

Проектта катнашучылар белән кайчандыр танылган “Фабрика звезд” продюсеры Лина Арифулина шөгыльләнгән.  Ике проект арасында охшашлыклар булуын оештыручылар да әйтте. Шулай да “Яңа йолдыз” проекты татар телен һәм мәдәниятен үстерү максатын алга сөрә.

– Без катнашучыларның гаиләләрен күрсәтәбез. Ә һәр гаиләнең үз традицияләре, үзенчәлекләре бар. Мәдәниятыбыз нәкъ менә шуннан башлана бит. Шуңа да әлеге проектны президентыбыз Рөстәм Миңнеханов та хуплады, – дип сөйләде Динә Гәрәева.

Моннан тыш, ул “Яңа йолдыз”ның зур чыгымнар тәлап итүен дә искәртте. “Ни өчен мондый проектлар моңарчы үткәрелмәде? Чөнки алар бик зур көч һәм финанс ярдәм тәлап итә”, диде Динә Марат кызы. “Яңа йолдыз” – “Барс Медиа”ның Президент ярдәме белән үткәрелүче беренче проекты икән.

“Мин аның проектта катнашасын белмәдем…”

Матбугат очрашуында катнашучылар арасында Татарстанның халык артисты, бәйгенең жюри әгъзасы Зәйнәб Фәрхетдинова да бар иде. Аны “Яңа йолдыз”ның әнисе” дип атадылар. Ничек аңларга белмәссең: бер яктан, Зәйнәб ханым җыр сәнгатен яхшы аңлаучы белгеч, һәм аның моның ише проектларның “әнисе” булырга тулы хакы бар. Икенче яктан, проектта аның улы – Акбулат (Булат Билалов) катнаша, аның җиңүенә ишарә булмадымы икән, дип уйлап куйдым.

– “Яңа йолдыз”ның жюри әгъзасы булачагымны соң белдем, ә улымның проектка гариза җибәрүен, гомумән, белмәдем дә, – диде җырчы үзе. – Шулай да, проект катнашучыларны гына түгел, мине дә күп нәрсәгә өйрәтте. Ул яшь артистларга барлык заманча тенденцияләр белән танышырга мөмкинлек бирде.

Лилия Гыймазова