Волонтерларга – рәхмәт сүзе, халыкка – вакцина

Шушы көннәрдә Россия Президенты Владимир Путин вице-премьер Татьяна Голиковага киләсе атнадан вакцинацияләүне башларга боерган иде.

Татарстан «Спутник V» вакцинасының беренче партиясен кабул итәргә әзерләнә. Вакцина республиканың 40 медицина оешмасына тапшырылачак. Барлыгы 3700 доза кайтартылачак. Республика халкы бушка һәм ирекле рәвештә прививка ясата алачак. Вакцина кадату өчен коронавируска һәм антитәнчекләргә бәйле тест узарга туры киләчәк. Антитәнчекләр булган очракта һәм кешедә коронавирус табылса, прививка ясалмаячак. Тестларның бушлай булу-булмавына ачыклык кертмәделәр. «Якын арада регламент әзер булачак, шуны көтәргә кирәк», – диде Татарстан Президенты матбугат хезмәте җитәкчесе Лилия Галимова.

«Спутник V» белән бергә Татарстанда «Эпивак-Корона» вакцинасының сынау этабы да бара. Монда республиканың 600гә якын кешесе катнаша.

Журналистлар Президент вакцина ясатырмы дип тә кызыксынды.

– Әле массакүләм вакцинацияләү юк. Бездә прививка ясатырга теләүче кешеләр бар, шуңа күрә, әйдәгез, башта бу кешеләр ясатсын. Хәзер бу эштә катнашырга теләк белдерүчеләргә ясарга кирәк, – дип җавап бирде Лилия Галимова. Сүз уңаеннан, ул журналистлардан да прививка ясатыр идегезме дип сорады. Теләк белдерүчеләр күренмәде, «башта коронавируска тест бирергә кирәк бит» диде арабыздан беребез. «Яңа елга бүләк ясыйкмы?» – дип шаяртты Президентның матбугат хезмәте җитәкчесе.

Таң атканчы эшләргә ярармы? Казанның ресторатор һәм отельерлар ассоциациясе Рөстәм Миңнехановка янә мөрәҗәгать иткән. Алар Яңа ел кичендә иң кимендә иртәнге 3кә кадәр булса да эшләргә рөхсәт сорый. Лилия Галимова әйтүенчә, республика җитәкчелеге әлеге хатны күргән. Президент әлеге үтенечне Роспотребнадзор белгечләренә санитар-эпидемиологик куркынычсызлык ягыннан өйрәнергә кушкан. Якын арада Казан Кремленнән җавап булачак.

Татарстан Хөкүмәте коронавируска бәйле чикләүләр аркасында Татарстанга кайта алмый калган 200гә якын студентны махсус рейс белән кайтарырга ниятли.

– Хәзерге вакытта республика оператив штабында студентларны Татарстанга алып кайту өчен махсус рейс оештыру мәсьәләсе хәл ителә. Казахстанда белем алучы 200гә якын студент бу. Якын көннәрдә алар укуларын дәвам итү өчен республикага кайтачак, – дип аңлатты Лилия Галимова.

Ул, гадәттәгечә, Рөстәм Миңнехановның бу атнада буласы очрашулары белән дә таныштырды.

4 декабрьдә Президент Татарстанның Профсоюзлар федерациясе конференциясендә катнашачак. Чарада берләшмәнең яңа җитәкчеләрен, урынбасарларын да сайлаячаклар. Конференциядә Бәйсез профсоюзлар федерациясе рәисе Михаил Шмаковның да катнашуы көтелә.

5 декабрьдә Бөтендөнья волонтерлар көне билгеләп үтелә. Бу уңайдан Рөстәм Миңнеханов волонтерлар белән очрашырга ниятли. «Хәзерге вакытта Татарстанда 62900 кешедән торган 1247 волонтерлар берләшмәсе эшли. Алар арасында «Җиңү волонтерлары», эколог, медик волонтерлар бар. Быел «Без бергә» проектының төбәк штабы һәм «Ярдәм янәшә» республика хәрәкәте оешты. Волонтерлар әле дә өйгә азык-төлек, дарулар китерү белән шөгыльләнә. Бу хәрәкәткә 6 меңнән артык кеше кушылган. Президент әлеге эшчәнлек өчен аларга рәхмәт белдерәчәк, бүләкләр тапшыру да каралган», – диде Лилия Галимова.

Чулпан Гарифуллина