Кара миләш
Немец галимнәре коронавирустан дәвалауда кара миләш согының файдасы күп дип язып чыккан иде. Россия галиме, профессор, биология фәннәре докторы Алексей Аграновский исә мондый чараларның медицина дәвасы белән бернинди уртаклыгы да юк дип саный. Дөрес, кара миләш – табигый продукт һәм иммунитетны күтәрә. Аның белән организмга витаминнар керә.
Тик ул турыдан-туры вируска каршы тора алмый. Кара миләш согы вирусны үтерми. Аннары аның канны куертуын да онытмыйк. Күп ашаганда ашказанына авырлык килергә мөмкин.
Керән тамыры
Керән тамыры – бактериягә каршы тору үзлегенә ия булган үсемлек. Аны электән салкын тигәндә бал белән кулланганнар. Керән тамыры – витаминнарга бай, иммунитетны күтәрә. Анда аскорбин кислотасы әфлисун, лимонга караганда да күбрәк.
Тик керән тамырын күп ашый алмыйсың, чөнки эчке әгъзаларны яндырырга мөмкин. Ул коронавирустан дәваламый һәм вирусны юкка чыгару көченә дә ия түгел.
Имбирь һәм лимон
Пандемия башланган чорда аларның файдасы хакында күп сөйләнелде һәм бәяләре бик нык артты. Бер ара кибетләрдән юкка чыгып тордылар. Аларны коронавирустан дәвалауда иң нәтиҗәле чара дип тәкъдим итүчеләр булды. Имбирь, лимоннан эшләнгән төнәтмәләр салкын тигәндә организмны тизрәк җылыта, авыртуны баскан кебек була, шулай ук витаминнарга баета. Дарулар белән дәваланганда аларны да эчәргә мөмкин.
Тик берсе дә даруны алмаштырмый һәм коронавирус белән авырганда могҗиза тудыру сәләтенә ия түгел.
Тозлы кәбестә
Европаның бер төркем галимнәре исә тозлы кәбестә, ачытылган сөт ризыклары коронавирустан организмны саклый дигән нәтиҗәгә килгән. Янәсе, алардагы антиоксидантлар иммунитетны ныгыта, организмга инфекция үткәрми. Кеше авырса да, шулар ярдәмендә чирне җиңелрәк үткәрә, дип фаразлаучылар да бар.
Тик йөткерә башласаң, тын кысылса, коронавирусның башка билгеләре күзәтелсә, тозлы кәбестә, катыкны бер читкә куеп, тизрәк табибка күренергә кирәк, ди белгечләр.
Бәрән мае, ат ите шулпасы
Югары температурадан, үпкә чиреннән бәрән маен ашау булыша. Аның белән тәнне ууның да файдасы бар, дип киңәш итүчеләр күп. Майны вакытлыча куллануның зыяны булмаячак, аның энергия чыганагы икәнен беркем дә инкарь итмәс.
Тик ул да төп дәвалану чарасы түгел. Аны артык күп ашау холестеринны арттырырга һәм йөрәк-кан тамырларына, баш миенә начар тәэсир итәргә мөмкин. Ат ите белән дә шулай. Ат ите шулпасы җиңел үзләштерелә, тик коронавирус инфекциясеннән дәваламый.
Фото: pixabay.com
