Казанда бер кыз интернет аша акча эшләргә уйлап, 400 мең сумыннан колак каккан

Казанда бер кыз криптовалюта сату-алуда акча эшләргә маташып, мошенниклар корбанына әйләнгән.

Сентябрь ахырында социаль челтәрдә “zhaojiahua” дигән бер егет белән танышкан ул. Инглиз телен шомарту ниятеннән, шуның белән аралаша башлаган. Егет үзенең Кытайда Шанхай шәһәрендә яшәве турында әйткән.

Электрон хатлар аша дуслык инде шактый ук ныгыгач, егет кызга криптовалюта сату-алу юлы белән акча эшләргә киңәш иткән. Тегесе каршы килеп тормаган: кытайлы өйрәткәнчә, телефонына ике кушымта урнаштырган. Беренчесен – криповалюта сатып алу, ә икенчесен – шуны ук кыйммәткә сату өчен. Шулай итеп, Казан кызы 19 сентябрьдән 12 октябрьгә кадәрге чорда электрон валюта сатып алу максатында сайт счетына 380 мең сум чамасы акча күчергән. Тырыша торгач, бер тапкыр криптовалютаны әйбәт кенә сатып, 30 мең сум акча да эшләп куйган. Аннан инде 600 мең сум эшлим дигәндә генә көймәсе комга терәлгән. Сайтның сервис хезмәте, акча алу өчен, 100 мең сум күләмендә керемгә салым түләү зарурилыгы турында хәбәр иткән. Ул гына да түгел, салым түләү өчен 160 мең сумлык криптовалюта сатып алырга кирәклеге, шуннан соң гына акчаны алып булуы аңлатылган. Баерга уйлаган кыз, нишләсен, монысына да риза булып, криптовалюта счетына таләп ителгән акчаны күчереп куйган. Шуннан, ни хикмәт, аккаунты ябылуын күреп, янә сайтның сервис хезмәтенә мөрәҗәгать итәргә мәҗбүр булган. Аннан бу хәл, янәсе, үзенә акча “юуда” шик төшүенә бәйләп аңлатылган. Кайгыга баткан кыз шундук теге Кытай егете белән элемтәгә кергән. Ә анысы, берни булмагандай, акчаңны кире кайтара алмаячаксың, дигән дә, башка җавап бирмәгән. Шуннан соң гына Казан кызы үзенең мошенниклар корбанына әйләнүен аңлаган.

Хәзерге вакытта “Мошенниклык” статьясы буенча җинаять эше кузгатылган. “Сафиуллин” полиция бүлеге хезмәткәрләре килеп туган хәлләрне тулысынча ачыклау өчен оператив-эзләү чаралары үткәрә, дип хәбәр итә Эчке эшләр министрлыгының Казан шәһәре буенча идарәсе матбугат хезмәте.