Татарстанның Профсоюзлар федерациясе 800 кешене берләштерә. Быел алар үзләренең 115 еллыгын бәйрәм итә. Россиянең бәйсез профсоюзлар оешмасына да 30 ел. Әлеге уңайдан Казанның «Сәйдәш» мәдәни үзәгендә соңгы биш еллыкка нәтиҗә ясап, киләчәккә планнар кордылар. Очрашуда Татарстан Президенты Рөстәм Миңнеханов та катнашты.
– Татарстандагы Профсоюзлар федерациясе – безнең республикадагы иң эре тармакның берсе. Республикада эшчеләрнең хокукларын һәм кызыксынуларын яклауның нәтиҗәле механизмы бар. Сез хезмәт кешесенең төп яклаучысы булып торасыз. Сезнең алда тагын да зур эшләр тора. Эшче һөнәрләрнең кирәклеген аңлату, аларны популярлаштыру мөһим. Бу уңайдан 2019 ел Эшче һөнәрләр елы дип игълан ителгән иде. WorldSkills дөнья чемпионаты уздырылды, ресурс үзәкләре булдырылды, – ди Рөстәм Миңнеханов.
Президент «соры базар» проблемасына да тукталды. Пандемия вакытында андыйлар ачыкланды, ди ул. Иң авырткан урын дип эш урынындагы һәлакәтләрне атады.
– Куркынычсызлык кагыйдәләрен үтәмәү проблемасы җитди мәсьәләләрнең берсе булып кала. Соңгы биш ел эчендә 235 кеше эш урынында һәлак булган. Шуларның 47сенең быел гомере өзелгән. Биш елда 679 кешенең сәламәтлегенә зыян килгән, шуларның 26сы быел имгәнгән, – диде ул.
Сәламәтлек темасыннан ерак китмичә, Президент коронавируска бәйле вазгыятькә тукталып, хезмәт коллективларында аеруча саклык чаралары күрү кирәклеген искә төшерде. Роспотребнадзор таләпләрен үтәргә чакырды.
Очрашуда Татарстанның Профсоюзлар федерациясе рәисен дә сайладылар. Рәис итеп кабаттан Елена Кузьмичева сайланды.
Татарстанның Профсоюзлар федерациясе составына 23 оешма керә. Алар төрле юнәлештәге 20 төбәк бүлекләрен үз эченә ала.
– Республикада эшчеләрнең тормыш шартларын яхшырту, аларның хокукларын яклау буенча зур эшләр башкарыла. 2020 ел башында минималь хезмәт хакы 14 мең сумны тәшкил итте. 2015 елда ул 7309 сум иде. 2020 елда эшчеләргә төнге смена, тиешледән артык, зыянлы урында эшләү һәм ике һөнәрне берләштергән, бәйрәм һәм ял көннәрендә эшләгән өчен өстәмә түләүләр барлыкка килде. Республикада профсоюз оешмаларына беркетелгән эшчеләр берсе дә читтә калмый. Аларның эш урыннарында уңайлы шартлар тудыру белән беррәттән сәламәтлекләрен дә кайгыртабыз. Санаторий-курорт мәсьәләсе иң кирәкле юнәлеш икәнен раслады. Ел саен 46 меңнән артык кешегә ял йортларына юллама бирелде, – диде Татарстанның Профсоюзлар федерациясе рәисе Елена Кузьмичева. – Яшьләр сәясәтенә дә зур игътибар бирелә. Бездә 266 меңнән артык 35 яшькәчә кеше эшли. Быел аларның ярдәме зур булды. Пандемия вакытында өлкәннәргә волонтерлык ярдәме күрсәттеләр. Яшьләр бар җирдә актив. Төрле бәйрәм чараларымы, бәйгеләрме – алар алгы рәттә. Шундый көчле команда барда әллә ниләр эшләп була.
Профсоюзларның булдыра алганына беркемнең дә шиге юк. Рөстәм Миңнеханов та бу хакта әйтте. «Эшегезгә – уңай бәя, алдынгыларга бүләк бирдек. Хәзер эшләргә дә эшләргә», – диде ул.
Гөлгенә ШИҺАПОВА
