Безгә Балык Бистәсе районының Яңа Ырга авылыннан 54 яшьлек Илһам Әхмәтгалиев мөрәҗәгать иткән иде. «Мин – II группа инвалид. Быел җәй көне бер аягымны кистеләр. Икенче аягым булса да, аннан файда юк. Шуңа күрә бу чирем белән I группа бирерләр дип көтәм. Тик ВТЭКта өметле җавап ишетмәдем. Кайтып хәлемне белеп, проблемамны хәл итәргә ярдәм итегез әле», – диде укучыбыз.
Хат эзеннән Балык Бистәсенә юл тоттык. 2003 елда Илһам әфәндене машина бәрдергән. Бот сөяге чыгып, аягы сынып, ике ай урын өстендә яткан. 2010 елда икенче юл фаҗигасенә очрап, тагын операция кичергән. Шуннан соң бер аягы 10 сантиметрга кыскарган. Бот сөяге һаман чыгып интектергән. Бу авыруы белән аңа II группа биргәннәр. Быел авырткан аягын кискәннәр. Ун көн эчендә 3 операция кичергән ул. Инвалидның язмышы шундыйрак.
Аяксыз калып инвалидлык ала алмаган Илһам Әхмәтгалиев: «Миңа булмаса, тагын кемгә?»
Авторны борчыган сорауларга район социаль яклау бүлеге, Пенсия фонды, район үзәк хастаханәсенең баш табибы һәм авыл җирлеге башлыгы белән бергәләп җавап табарга тырыштык. Балык Бистәсе район хастаханәсенең баш табибы Мансур Китаев: «Илһам Әхмәтгалиевның документларын җыеп, I группага тәкъдим итеп карарбыз. Моны комиссия хәл итә. Аңа ярдәм итәргә тырышырбыз», – диде. Социаль яклау бүлеге җитәкчесе Рафаэль Исмәгыйлев тә, Югары Ырга авыл җирлеге башлыгы Ринат Баһаветдинов та, ярдәмебездән ташламабыз, дигән сүзләр әйтте.
Язма чыкканнан соң өч атналап вакыт үткәндер. Бу юлы Илһам Әхмәтгалиев борчылып түгел, шатланып шалтырата.
«Рәхмәт, I группаны гомерлеккә бирделәр». Аның беренче сүзе шул булды.
– Сез килеп киткәч, табиб өйгә килеп хәлемне белде, аннан комиссиягә чакырып тикшерделәр. Социаль яклау бүлеге белгечләре хезмәткәр билгеләргә вәгъдә итте. Әлегә апам тәрбияли. Хәзерге вакытта инвалидлар декадасы бара. Авыл җирлеге башлыгы күчтәнәчләр китерде. Башта, I группа бирмиләр, дип ачу килгән иде, хәзер мәсьәлә уңай якка хәл ителгәч, тынычланып калдым. Безгә күп кирәкми, аздан да күңел була. Гаделлек бар икән ул. Аны табарга ярдәм иткән өчен редакциягә зур рәхмәтемне белдерәм, – диде Илһам әфәнде.
Сәрия Мифтахова
