Татарстан илдә спорт корылмалары иң күп булган беренче өч төбәк арасына кергән. Республикада аларның саны 11205кә җитте. Спорт министры Владимр Леонов журналистлар белән очрашып, узып баручы елга нәтиҗә ясады.
Матбугат очрашуын Владимир Леонов татарча аралашудан башлады. Министрның тел байлыгы артканы сизелеп тора. Моның белән горурланганын үзе дә яшерми. Билгеле булганча, Казанда кайбер министрлык җитәкчеләре өчен татар теле курслары ачылды. Универсиадага әзерләнгәндә инглизчәсен шомарткан Леонов республика юбилее елында Тукай теленә игътибарын арттырган.
Универсиада димәктән, әлеге зур чарага әзерләнгәндә республикада күп санда спорт корылмалары калкып чыкты. ТАССРның 100 еллыгында да зур эшләр башкарылды. Теге вакытта төп игътибар Казанга бирелсә, бу юлы спорт инфраструктурасын үстерү эше бөтен республикага җәелде. Быел Татарстанда барлыгы 406 спорт корылмасы барлыкка килде, 115 зур объект тапшырылды. Алар Казан, Чаллы, Түбән Кама һәм Әлмәттә генә түгел, Буа, Тукай, Мамадыш, Яшел Үзән, Биектау, Мөслим, Нурлат, Лаеш, Балык Бистәсе һәм башка районнар халкын спорт һәм физик культурага якынайтачак. Бу эшне киләсе елда да дәвам итәргә ниятлиләр. Төзелеш һәм төзекләндерү эшләренә миллионлаган сум акча бүлеп бирелгән. Спорт корылмалары саны буенча Татарстан илдә бары Мәскәү һәм Башкортстаннан гына калыша.
Демография илкүләм проектының «Спорт – яшәү нормасы» федераль проекты кысасында Чаллыда һәм Яшел Үзән районында 4 спорт объекты эшли башлады. 9 районда ГТО мәйданчыклары ачылды. Татарстанда халыкның 50,1 проценты физик культура һәм спорт белән шөгыльләнә. «Бу – 1,8 миллионнан артык кеше дигән сүз. Хәзер инде аларның санын 2 миллионга җиткерү нияте бар», – диде министр.
Мәгълүм сәбәпләр аркасында быел спорт ярышлары башка еллар белән чагыштырганда азрак оештырылды. Шулай да якташларыбыз барган җирдән буш кайтмаска тырышкан. Республика вәкилләре илкүләм һәм халыкара ярышларда барлыгы 425 медаль откан, шуның 124е – алтын. Татарстанның 395 спортчысы теге яки төр буенча ил җыелма командасына кергән. Шунысы гаҗәп узган ел андыйлар 10 кешегә азрак булган. 40 кешенең исә киләсе елда Токиода узасы Җәйге Олимпия уеннарына бару өмете бар. Аңлашылганча, кемнәр барасы соңрак билгеле булачак. Бару-бармау спортчыларның үзләренә генә бәйле түгел. Коронавирус зәхмәте бар дөньяның астын-өскә китерсә, Россия, шул исәптән, Татарстан спортына допинг белән бәйле шау-шу да йогынты ясый.
Медальләр димәктән, министрдан беренче адымнарын республикада ясаган, ә хәзер башка төбәкләр өчен тир түгүче спортчыларны, әйтик, фигуралы шуучыларны кире кайтару турында сорадылар. «Без сөйләшергә әзер. Казанда Россия Кубогы этабы узганда бу хакта федерациягә дә, кайбер тренерларга да әйттем. Әмма моның өчен башта спортчының теләге булу кирәк. Киләсе елда безгә мөрәҗәгать итүчеләр булыр дип уйлыйм», – диде Леонов. Татарстанның фигуралы шууда бүген иң көчле спортчылардан саналган Камилә Вәлиеваны кире кайтару өмете бар. Казанда туып үскән кыз юниорлар арасында дөнья чемпионы, гран-при иясе булып танылды. Аны Алинә Заһитовага алмаш итеп күрәләр.
Владимир Леоновтан урынбасарына карата ачылган җинаять эше турында да сорадылар. Министрлык вәкилен спорт корылмалары өчен боз чистарту машинасын сатып алганда бәяне махсус арттыруда һәм шул рәвешле бюджетка зыян салуда гаеплиләр. «Әлегә тикшерү бара. Бәя бирергә хокукым юк. Органнарның нинди нәтиҗәгә килүен көтик», – диде министр.
Илнар ХӨСНУЛЛИН
