Рөстәм Асаев, Татарстанның атказанган артисты:
– Быелгы ел вирусы белән истә калыр. Без дә авырдык, шөкер, җиңел уздырдык, әмма мораль яктан авыр булды. Бик күп танышларыбызны югалттык. Төрле чараларда да катнашырга насыйп булды. Җиңү бәйрәмендә дә чыгыш ясадым, әле дә гел сәхнәдә. Үзчикләү вакытында интернетны өйрәндем. Тик утырмадык – онлайн концертлар куйдык. Җырлар яздырдык, клиплар төшердек. Шатлыгым – кызым Гөлназ кияүгә чыкты. Аллага шөкер, кияү белән матур гына яшәп яталар. Киләсе елда тормышка ашырырга теләгән зур хыялларым бар. Әлегә әйтми торам, сер булып калсын.
Айгөл Шәйхелисламова, декреттагы әни:
– Үтеп баручы ел бик тә истәлекле булды. Аллага шөкер, кечкенә кызыма иптәшкә энекәш алып кайттык. Бәби таба башлагач кына бераз күңелсезлекләргә юлыктым. Пандемия аркасында бер бала тудыру йорты ябылып, икенчесенә җибәрделәр. Анысы башкасына озатты. Шулай итеп, азапланып йөрергә туры килде. Әмма балабыз тугач, тагын да зур шатлык өстәлде. Ипотекага алган фатирыбызны ике ел эчендә түләп бетерә алдык. Әле ярый, тәвәкәлләп, фатир алганбыз, дибез. Бәяләр артып китте бит. Безнең фатирлар хәзер 2 миллионга кыйммәт тора. Әлегә ике балам да өйдә. 3 яше тулып китсә дә, бакчага чиратыбыз җитмәде. Киләсе елга анысы да булыр дип көтәм. Кайчакларда эшемне юксынып куям. Укучыларымны сагынам.
Әнвәрия Жданова, сиделка булып эшли:
– 2020 ел җиңел булмады, иремне югалттым. Казанга килеп бәхетемне тапкан кеше мин. Ирем шулкадәр әйбәт булды. Озак яши алмасак та, рәхәт гомер кичердек. Хәрби иде ул минем. Режим белән яшәгән кеше иде. Тик әҗәл сәгатең сукса, бер нишләп булмый шул. Инсульт булып, озак та тормады, китеп барды. Бик авыр чакларым әле. Үземне кулга алып, алга таба ничек тә яшәргә тырышырмын. Еллар тыныч булсын, кайгы-хәсрәтләр күрмәсәк иде.
Әлфия Галиәхмәтова, блогер:
– Быелгы елның борчулары да, шатлыклары да булды. Ел башында ирем белән икебез авырып алдык. Авыру сәламәтлекнең кадерен белергә өйрәтте. Хәлем җиңел булды дия алмыйм. Хәтта аңымны да җуйдым. Аллага шөкер, җиңә алдык. Тагын бер күңелсез хәл – кодабызны югалттык. Шатлыгыбыз да булды. Улым Ниязның гаиләсенә эшеннән өч бүлмәле фатир бирделәр. Ринат белән Илүзә безне кызлы итте. Көтеп алынган Сәфинәбез туды. Әле аларның тагын бер зур яңалыклары бар. Анысын сер итеп саклыйлар. Соңрак әйтәчәкләр. Инстаграмда 41 мең дустым бар. Элек эшләгән вакытта төшке аш вакытында ятып тора ала идем. Блогер булгач, эш харап. Әле менә сезнең белән сөйләшкәннән соң тагын 51 кешегә җавап язасы бар. Язмасаң, үпкәлиләр. Төрле кеше бар. Күбесе авырып киңәш сорый, кемдер рецепт бирүемне үтенә. Яңа елны Назыйм абыең белән икәү бергә каршылыйбыз. Нияз улым 31е эшли, Ринатлар исә Апаска кайта. Бөтенебез бергә гыйнварда җыелырга дип торабыз.
Алчәчәк Шәвәлиева, завод эшчесе:
– Ел уңышлы булды. Аллага шөкер, барыбыз да исән-сау. Декреттан соң эшкә чыктым. Улым да, кызым да балалар бакчасына яратып йөриләр. Ел башында бераз авырып алган идек, хәзер бар да тәртиптә инде. Вирус дип өйдә бикләнеп утырмадык. Барасы килгән җиргә йөреп тордык. Концерт-театрларны да чикләмәдек. Тагын бер сөенечебез – машинабызны яңарттык. Елны начар дип булмый – башка вакытта да авырмыйча тормыйсың. Иң мөһиме – арты хәерле булсын!
Райнур Әсхәдуллин, фермер:
– Аллага шөкер, 2020 ел начар булмады. Фермерлык эшләрем уңышлы булды. Кошларны күп үстердек. Калдыклардан табигый комбикормалар ясап сатам. Алучылар күп булды. Авырулар да урап узмады. Туганнарым, якыннарым барысы да исән-сау. Әмма ел ахырында гаиләбезгә борчу килде. Улым юл һәлакатенә очрады, коронавирус белән авыруы да ачыкланды. Янына керә алмадык, берничә көн билгесезлектә яшәдек. Шөкер, хәзер савыкты. Киләсе ел тыныч, имин булсын иде.
Илнур Азизов, физик мөмкинлеге чикләнгән кеше:
– Гаилә корып яши башлавыбызга ике ел булды. Бер теләк – бәби алып кайтасыбыз килә. Киләсе ел шундый сөенеч алып килсен дип телибез. Ел начар булды дип әйтә алмыйм. Авырулар килмәде, борчылмадык. Парлы булгач, тормышым үзгәрде. Һәр туган көнгә рәхмәт укыйм. Ярый әле өйләнгәмен дим. Икәү бергә бик рәхәт.
Илнур Әхмәтов, теш табибы:
– Бу елны тыныч уздырдык. Вирус чыккач та, паникага бирелмәдек. Безне Аллаһы Тәгалә саклады. Әмма бик күп кешеләрнең гомере өзелде. Бүтән мондый афәт килмәсен иде. 2021 елда коронавирус хакында онытсак иде. Соңгы елларда кешеләр үзгәрде. Бәлки, безгә бераз гына тыйнак булырга кирәктер. Бер-беребезне таптамасак, бәлки, бар да яхшы булыр иде.
Илдус Диндаров, журналист:
– Уңышлардан баш әйләнде, дип әйтәләр бит әле. Уенын-чынын бергә кушып әйтсәң, минем өчен дә шулайрак булды бу ел. 2019 ел ахырында эше бетеп, ел башында кулга кергән “Чорлар чатында” китабымны таратып бетерергә өлгермәдем, көтмәгәндә-уйламаганда, 2020 дә берьюлы тагын ике китабым дөнья күрде. Аның берсе — Татарстан китап нәшрияты нәшер иткән “Торна күзе” китабы. Төрле елларда иҗат ителгән повесть, хикәяләр, юморескалар, парчалар, публицистик язмаларны үз эченә алган. Икенчесе – “Кояшлы көннәрем, айлы төннәрем” дигәненә шигырьләрем кереп “кунаклаган”. Анысы – “Рухият” нәшрияты җимеше. Фәйрүзә Мөслимова белән белән Гәрәй ага Рәхимнең кереш сүзләре дә, яшерен-батырын түгел, күңелемә бик ошады. Иңатымны зурлаганнар, бәяләгәннәр. Укучылар да бик яратып укыйдыр кебек сизәм. Югыйсә, төрле очрашуларга, чараларга бу кадәр чакырмаслар иде. Иҗат кешесе өчен иң мөһиме шул бит инде. Каләмемне кулдан төшерергә исәбем юк әле. Шөкер, күп еллар эшләгән “Ватаным Татарстан” белән дә элемтәне өзмим.
