2021 ел давыллы вакыйгалар белән башланып китте. 6 гыйнвардан 7 гыйнварга каршы төндә газета хәбәрчесенең телефоны даими рәвештә чыелдап яңа хәбәрләр явуын белдерә башлады. Бу дөньяның кайсыдыр почмагында кайнар вакыйгалар бара дигән сүз иде. Реаль вакыт режимында Капитолийны штурмлаучыларның хәрәкәтләрен яктырткан видеороликлар килә башлаган икән.
Бездә төн, Вашингтонда исә закон чыгаручылар Байденның президентлыгын раслау белән мәшгуль булган эш сәгатьләре иде. Трампның үз яклыларны мәйданга чакыруына җавап итеп, Капитолий алдына килгән гыйсъянчылар полиция кардонын узып, Конресс бинасына үтеп керде. Конгрессменнар һәм сенаторларга эзне суытырга туры килде. Видеокадрларда полицейскийлар арасында да фетнәчеләрне үсендерүчеләр бар икәнен күрергә була иде. АКШта гаҗәп хәлләр башланды: рәсми Америка икегә бүленде. Капитолийда ату тавышлары яңгырады, корбаннар барлыкка килде. Болар барысы да сәяси фантастика жанрына караган хәлләргә охшаган, әмма чын иде.
Никадәр генә уңышлы башланмасын, фетнә җиңелде. Коткы таратучы Трампның «твиттер»ы бикләнде. Ә бит гыйсъянчылар арасында, Трампка хыянәт иткән өчен, вице-президент Майкл Пенсны тотып алып асып куярга җыенучылар да булган диләр. Хәзерге глобаль капитализмның төп ныгытмасы һәм терәге булган, бөтен дөньяда демократияне яклыйбыз дигән сылтау белән ут һәм үлем чәчүче АКШ нигезендә беренче тапкыр зур чатнау барлыкка килде. Анда тарихта моңарчы күрелмәгән хәлләр уйналды һәм уйналып ята. Ун көннән азрак хакимият дилбегәсен үз кулында тотып торасы калган Трампны, АКШ Конституциясенә 25 төзәтмәгә нигезләнеп эштән читләштерү һәм импичмент процедурасы башлау эше җәелдерелеп ята. Әгәр бу икенче импичмент уңышлы барып чыкса, Трамп бүтән президентлыкка дәгъва итә алмаячак. Океан артында ике кара көч, дистә еллар буе террор һәм кан коюлар оештыручы астыртын сәясәтчеләр үзара маңгайга маңгай килә башлады. Террор Американың үзенә бумеранг булып әйләнеп кайтты. Америка үзенең демократия бастионы дигән ялган имиджын югалта башлады. Әлбәттә бу хәлләрнең артында Трамп та, Байден да түгел, бөтен планетаны кулга төшереп үз кубызына биетергә ниятләгән явыз көч тора. Җир шарында хаос тарату һәм кешелек дөньясын өметсезлеккә төшерү аша ул үзенең кара ниятләрен тормышка ашырырга тели. Без «Ватаным Татарстан»да фетнә очкынының бер илдән икенче илгә төшеп бөтен дөньяны яулап алачагын күптән әйтеп киләбез. АКШта барган гыйнвар вакыйгалары – безнең фаразларның тормышка ашу юлында булуының тагын бер дәлиле ул.
Янкилар президентлык тирәсендә ут үрләткәндә, кечкенә генә Кыргызстанда якшәмбе көнне сайлау булып узды. Кыргызлар әнә бик аптырап тормыйлар, президент ошамаса, ишекләрне бәреп кереп түнтәрәләр дә яңасын сайлап куялар. Бу соңгы сайлауда әле моннан берничә ай элек кенә төрмә шулпасы чөмергән зек Садыр Җапаров җиңде. Кичәге тоткынны бүген вәкаләтләре көчәйтелгән президент вазыйфасында күрәбез. Яңа түнтәрелешне кыргызлар кайчанга ниятлиләрдер, анысы әлегә мәгълүм түгел.
Рәшит Фәтхрахманов
МарианнаУжастик и все.«Гомер итүебезгә 60 ел, безгә акча тиешме?»
Загрузка ...
