Татарстанда коронавируска каршы күмәк вакцинация башланды

Республикада коронавирус инфекциясенә каршы күмәк вакцинация башланды. Аның белән әлегә 57 медицина оешмасы шөгыльләнә. Казанда андый урыннар – 12. Районнарда, авылларда яшәүчеләр үзәк хастаханә сырхауханәсенә мөрәҗәгать итә ала. Киләчәктә ул сан тагын да артачак.

Республикага хәзергә 13400 доза вакцина алынган. 5178 кеше прививкалы булган инде. Аларның байтагы – сәламәтлек саклау, мәгариф хезмәткәрләре, социаль хезмәткәрләр. Бер меңнән артыгы икесен дә ясаткан. Бу хакта Татарстан сәламәтлек саклау министры урынбасары Владимир Жаворонков сөйләде.

– Белгәнебезчә, ковид-19дан вакцинация ике этапта башкарыла. Беренче прививкадан соң 21 көн үткәч, икенчесен ясыйлар. Икенче прививкадан соң гына организмда чиргә каршы антитәнчекләр барлыкка килә һәм шулар инфекциядән саклый. Беренчесеннән соң әле моңа өметләнергә иртәрәк, – ди урынбасар.

Белгечләр, бүгенге көндә ковид-19дан саклану чарасы буларак, вакцина ясату иң кулае, дип сөйләсә дә, кайбер сырхауханәләрдә аның җитәрлек булмавы турында әйтәләр һәм чиратка язылырга кушалар. Ник алай килеп чыга соң? Ул җәһәттән Владимир Жаворонков:

– Борчылырга кирәкми, коронавирус инфекциясеннән вакцинация ашыгыч эшләнергә тиешле чара түгел. Озакламый аны ясау урыннарын күбәйтәчәкбез. Теләгән кеше аны барыбер ясатачак, әлегә чиратка язылыгыз, белгечләр сезне үзләре чакырып алыр, – ди ул. – Шул ук вакытта беркемне дә ирексезләмибез, прививка ясаткан кешегә кызыксындыру чаралары да күрелми. Аның өчен өстенлекләр дә каралмаган. Файдаланырга махсус паспорт та тапшырмыйбыз. Бәлки киләчәктә федераль үзәк андый тәкъдим белән дә чыгар, кем белә… Әлегә безнең бурыч – вакцинацияне сыйфатлы, нәтиҗәле итеп үткәрү.

Роспотребнадзорның Татарстандагы идарәсе җитәкчесе урынбасары Любовь Авдонина исә «Спутник V» вакцинасының да, бүтәннәре кебек үк, чирдән 100 процент саклый алмавын тагын бер мәртәбә кисәтте. Ләкин аннан соң авыр форма, өзлегүләр һәм үлем-җитемнәр булмаячак. Ковидтан вакцина беркемгә дә мәҗбүри ясалмый, дисәләр дә, аерым категория шунсыз эш урынына кертелмәячәк. Әйтик, ковидка каршы ПЦР-анализ алучы лаборант, вируслы чир ияртү куркынычы зур булганлыктан, прививканы һичшиксез эшләтергә тиеш. Мондый төркемнәр тагын бар. Чир таралу куркынычы булганда, кеше прививкасыз үзе эшли торган оешмага кертелмәскә мөмкин.

– Вакцинация ясау нокталарын күбәйтергә кирәк. Бу эштә республикадагы сәнәгать оешмаларын да җәлеп итү зарур, – дип белдерде Татарстан Президенты Рөстәм Миңнеханов атна ахырында Хөкүмәт йортында үткән киңәшмәдә. – Цифрлаштыру министрлыгына ул уңайдан күрсәтмә бирдем. Сәламәтлек саклау министрлыгы белән вакцина ясатучыларның исемлеген булдырдылар. Бу эш февральдә дә дәвам иттереләчәк.

Штаб кайда, күпме кешегә прививка ясалуы хакында көн саен мәгълүматлар җиткереп торачак икән. Президент та халыкны бер үк вакытта Роспотребнадзор идарәсе таләпләрен үтәргә чакырды. Битлек кияргә, дистанция сакларга… Любовь Авдонина: «Татарстанда эпидемиологик вазгыять тыныч һәм тотрыклы, – ди. – Дөрес, Яңа ел каникулларыннан соң ниндидер нәтиҗә ясарга иртәрәк әле. Моны атна-ун көннән соң гына әйтә алабыз». Балалар арасында да авыручылар артмаган.

Россиядә эшләнгән икенче «ЭпиВакКорона» вакцинасы белән кызыксынучылар да шактый. Аның республикага гыйнвар азагы – февраль башында кайтуы көтелә. Узган ел республикада 500 кеше әлеге вакцинаны сынау проектында катнашкан иде. Кадар алдыннан һәрбер кешедән антитәнчекләргә анализ алдылар. Ул булса, прививка ясалмады, димәк, кеше аның белән авырган инде. Хәзер исә «Спутник V»га өстенлек бирелә. Вакцинация үткәрер өчен антитәнчекләр анализы алынмый. Ә бәлки ул бардыр һәм шуңа өстәп вакцина да кадатсаң, зыяны булмасмы? Владимир Жаворонков аңлатуынча, күптән түгел генә авырган һәм ковидтан шикләнгән очракта, ул хакта прививка ясаучы табибка әйтергә кирәк. Любовь Авдонина, антитәнчек булган сурәттә дә, вакцинаның зарары булмаячак, дип ышандыра. Һәрхәлдә, вакцина үзе вируслы чир китереп чыгара алмый. Антитәнчекләрнең барлыгын һәм күләмен анализ тапшырып кына төгәл белергә мөмкин. Ковид белән авырып алганнан соң, прививкага кадәр 6–8 ай үтәргә тиеш.

– «Спутник V» ясаткач та, битлексез йөрергә ярамаячак, санитария таләпләрен үтәргә туры киләчәк, – ди Любовь Авдонина. Татарстан Сәламәтлек саклау министрлыгы коронавирус инфекциясеннән вакцина ясау белән шөгыльләнүче сырхауханәләр исемлеген булдырган. Исемлек белән министрлык сайтыннан танышырга мөмкин. Кайбер районнар алдан язылуда социаль челтәрләрне дә актив файдалана. Аның өчен исем-фамилияңне, туган елыңны һәм телефон номерыңны калдырырга кирәк.

Фәния Арсланова