Милли Шура рәисе Васил Шәйхразиев Татар иҗтимагый үзәген ябу мәсьәләсе буенча фикерен әйтте

Прокуратура Татар иҗтимагый үзәген ябу таләбе белән судка мөрәҗәгать иткән иде. Бу уңайдан Бөтендөнья татар конгрессы Милли Шура рәисе Васил Шәйхразиев чираттагы киңәйтелгән утырышта фикерен белдерде.

– Прокуратура ягыннан Бөтендөнья Татар иҗтимагый үзәге эшчәнлеге турында сораулар килеп чыкты һәм аны ябу буенча судка тәкъдим бирелде, – ди Васил Шәйхразиев. – Татар иҗтимагый үзәге күптәннән эшли. Беренче елларда үзенең фикерен бик төпле җиткерде. Татарстан, Россия нигезендә демократик чаралар буенча аны да тыңладылар. Еллар үткән саен җитәкчеләр дә алышынды, функцияләр дә икенчегә үзгәрде. Шул ук вакытта прокуратура үз ягыннан хөкемен төзегән икән, без хокукый илдә яшәгәч, аңлыйбыз – аларның таләпләре дөрес булырга тиеш. Шул ук вакытта карарны суд кына кабул итә ала. Безнең уебызча, шундый мөрәҗәгать булган икән, каршыда суд бар һәм Россиядә суд карар кабул итеп, тормышка ашырырга тиеш. Үзебезнең яктан, беренчедән, бәя бирү бик авыр, бер караганда эшләгән эшләре дә бар, икенче яктан, хокук нигезен бозуларын прокуратура күрсәтер, дип уйлыйбыз. Андый булса, суд үзенең карарын кабул итәр.

Безнең Бөтендөнья татар конгрессы бар, Татар иҗтимагый үзәге бар. Без бер-беребез белән юлларда татар эшләре буенча очрашсак та, функцияләребез төрле. Һәрвакыт үзебезнең устав нигезендә, халык өчен ныклап эшлибез. Шул ук вакытта һәрбер оешманың татар халкы нигезендә эшләве, телен, динен, гореф-гадәтләрен саклавы – төп бурыч. Шуңа күрә аларның хаталары булу-булмавын суд әйтер, ләкин шул ук вакытта без Бөтендөнья татар конгрессы нигезендә эшләрне алып барачакбыз. Быел республика күләмендә милли телләр һәм халыклар бердәмлеге елы дип игълан ителде.  Шул эшләрне тормышка ашыруда безнең ишекләр һәрвакыт ачык. Ул оешмалар безнең конгресс составындамы, юкмы, әгәр закон, устав нигезендә эшләсәләр, һәрвакыт хуплаячакбыз. Ишекләребез һәр татар кешесе өчен ачык, шуңа күрә судның карары бик мөһим булачак.


Фикер өстәү