Терлек сую, эшкәртү цехлары хезмәткәрләре өчен коронавирустан прививканы беренче чиратта ясау тәкъдиме белән чыктылар

Россия авыл хуҗалыгы министры Дмитрий Патрушев агросәнәгать комплексындагы һәм азык-төлек базарындагы хәлләрне күзәтү буенча оператив штабның 2021 елдагы тәүге утырышын уздырды. Анда Татарстан Авыл хуҗалыгы һәм азык-төлек министрлыгы җитәкчелеге дә катнашты.

Утырышта азык-төлек базарында бәяләргә бәйле хәлләр, агросәнәгать комплексы хезмәткәрләренә коронавирустан прививка ясау, тармакны кадрлар белән тәэмин итү һәм башка мәсьәләләр  каралган.

Дмитрий Патрушев басым ясап әйткәнчә, иң мөһим бурыч –  төп азык-төлек товарлары бәясенә тәүлек әйләнәсе мониторинг ясау. Хөкүмәт бәяләр үсүгә юл куймас өчен күп кенә ярдәм чараларын тәкъдим иткән. Болар – өстәмә субсидияләр, пошлина һәм квоталар. Моннан тыш Авыл хуҗалыгы, Икътисад һәм сәүдә министрлыклары белән сәүдә челтәрләре, берлекләр, ассоциацияләр арасында үсемлек мае, шикәр бәясен киметүгә юнәлтелгән килешү төзелгән. Министр әйтүенчә, бу чаралар үз  нәтиҗәләрен күрсәтә: җитештерүчеләрдә һәм ваклап сатуда шикәр комы, көнбагыш мае хакы арзаная.

Татарстан Авыл хуҗалыгы һәм азык-төлек министрлыгы да, Сәнәгать һәм сәүдә министрлыгы белән берлектә, авыл хуҗалыгы җитештерүчеләрендәге һәм сәүдә челтәрләрендәге бәяләрне даими күзәтеп-барлап тора. Республикада  җитештерүчеләрнең күпләп сату бәяләре шикәр комының бер килосына – 36 сум, үсемлек маеның бер литрына – 95 сумнан, сәүдә челтәрләрендә  – 46 һәм 110 сумнан артмый.

Быел коронавирус инфекциясе таралуга бәйле вазгыять тә игътибар үзәгендә калуын дәвам итә. “Аерым производстволарның оештырылу үзенчәлегеннән чыгып, агросәнәгать комплексы оешмаларына, төбәкләр хакимиятләре белән берлектә, терлек сую, эшкәртү һәм сортларга аеру цехлары хезмәткәрләре өчен беренче чиратта прививка ясату мөмкинлеген карау турында уйланырга кирәк. Төбәкләрдән алынган мәгълүматларга караганда, тармакта прививка ясатырга теләүчеләр өчен беренче этапта 250 мең доза вакцина таләп ителә, шул исәптән Татарстанда 2 меңнән артыграк кеше вакцина ясатырга ниятли. Башлангыч исәп-хисапларга караганда, тармакка 1 миллион доза вакцина кирәк”, – дигән Дмитрий Патрушев.