Борбаштагы малайлар пансионаты турында: «Беренче елны эшне оештыру бик җиңел булмады»

Борбашта малайлар пансионаты да бар. Бушап калган иске мәктәп бинасын Татарстанның баш казые, Борбашта яшәүче Җәлил хәзрәт Фазлыев тәкъдиме белән дини юнәлештә эш алып баручы пансионат итеп үзгәрткәннәр. Ул 2018 елның 1 сентябрендә ачыла. Шул елны бишенче сыйныфтан җиденче сыйныфка кадәр 14 бала кабул итәләр.

Хәзер исә пансионатта бишенче-унынчы сыйныфлардагы 20 үсмер яши. Алар көндез Борбаш гомуми белем бирү урта мәктәбендә, кичен мәчет каршындагы мәдрәсәдә укыйлар. Мәдрәсәдә ислам дине нигезләре, пәйгамбәрләр тарихы, гарәп теле, гакыйдә, әдәп-әхлак дәресләре үткәрелә. Борбашта туган телдән тыш, гореф-гадәтләр дә, йолалар да, дини бәйрәмнәр дә сакланып калган һәм балалар шуны күреп үсә. Байтак кына ата-аналар өчен иң беренче чиратта әнә шул мөһим. Баласы артыннан үзләре авылга кайтып урнашучы гаиләләр дә бар. Пансионатка үсмерләр Кукмара, Саба, Арча, Чаллы, Буа, Түбән Кама, Әстерхан, Башкортстаннан җыелган. Пансионатта яшәү, ашау-эчү бушлай. Барлык чыгымны «Ярдәм» хәйрия фонды күтәрә.

Дин сабагын укытырга Казаннан Нуршат хәзрәт Муллагалиевны чакырып кайтарганнар. Россия Ислам университетында белем алган мөгаллим сабакны татарча да, русча да үткәрә. Пансионатның тәрбия эшләре буенча директор урынбасары Динә Бәзәгетдинованы малайлар икенче әни дип йөртә икән. Динә ханым мәктәптә әхлак дәресен укыта.

– Беренче елны эшне оештыру бик җиңел булмады. Тәҗрибә өйрәнәм дисәң, мондый укыту системасы булган пансионатны табу җиңел түгел, – ди Динә ханым. – Балаларның байтагы элек мәктәптә фәннәрне русча укыган. Авылда кинәт кенә татарчага күчү авыр булды. Укудан тыш, сагыну, юксыну дигән психологик момент та бар. Хәзер ияләнделәр инде.

Мәктәптә яхшы укучыларга кызыксындыру чаралары бар. Чирекне «дүрт», «биш» билгесенә тәмамлаучыларга Җәлил хәзрәт өчәр мең сум премия бирә икән. Балалар монда килгәнче үк намазда була, сүрәләрне яттан беләләр, ураза тоталар. Мәчеттә Коръәнне гарәп хәрефләрендә укырга өйрәнәләр.

Улларын пансионатка бирергә теләүчеләр шактый булып чыкты. Балалар анда дини тәрбия ала, мөстәкыйльлеккә өйрәнә, табигатькә якыная. Бергәләп чаңгы-чана шуалар, су коеналар, балык тоталар. Авылда үткән бер генә чарадан да читтә калмыйлар. Борбашта узучы мөселман балалары сабан туенда да катнашалар. Истәлекле урыннарга экскурсияләргә, Балтачка бассейнга да йөриләр. Пансионатта ашханә, уку, йокы бүлмәләре бар. Берәрсе авырса, башкалардан аеру өчен изолятор бүлмәсе каралган.

– «Ярдәм» хәйрия фонды беренче елны пансионатка күпбалалы гаиләдә тәрбияләнүчеләрне, ятимнәрне алуны максат итеп куйды. Соңгы елларда укудагы өлгерешкә дә карый башладык, – ди Динә Бәзәгетдинова. –  Бала мәктәптә фәнне авыр үзләштерсә, аңа параллель рәвештә дин сабагы бирү авыр була.

Малайларны алда имтиханнар көтә. Әле бер тапкыр да чыгарылыш булмаган. Алга таба кайсы юнәлештә нинди һөнәр сайларлар… Тормышта үз юлларын тапсыннар, югалып калмасыннар иде. Җәлил хәзрәт тә, аларга, дин гыйлеме генә җитми, дөньяви гыйлем алуыгыз бик әйбәт, киләчәктә укуны дәвам итеп, һөнәр алырга кирәк булачак, дип әйтеп килә. «Нинди даирә кешесе белән аралашсагыз да, сүзегез үтәрлек булсын. Үзем күп җирләрдә йөрим, профессорлар белән дә, җитәкчеләр белән дә аралашам. Дөньяви гыйлемем булмаса, алар белән бер дәрәҗәдә сөйләшеп утыра алмас идем», – ди остаз.

Фәния Арсланова