Кечкенә йолдызлар “яңгыры”: “Балалар премиясе”нә кемнәр лаек булды?

“Күпсанлы халыкара, Россия һәм Татарстан күләмендә уздырылучы бәйгеләр, фестивальләр лауреаты, телевизион проектлар катнашучысы…”. Сәхнәгә әнә шулайрак чакырдылар аларны. Үзләре кечкенә булсалар да, әллә никадәр зур дәрәҗәләргә буйлары җиткән дип, күз тидерергә куркып утырдык. Сүзебез беренче тапкыр тапшырыла торган “Балалар премиясе” лауреатлары турында.

Әле кайчан гына “Яңа йолдыз” кабызган “Барс Медиа” компанияләр төркеме тамашачыга кечкенә йолдызчыкларын да күрсәтте. Танылган җырчыларның үкчәләренә басып килүче әлеге кыз һәм малайлар – атна саен “ТMTV” телеканалында бара торган “Балалы солянка” тапшыруы җиңүчеләре. Кыскасы, тәртипләр “TMTV музыкаль премиясе”ннән әллә ни аерылмый. Оештыручылар үзләре дә “Балалар премиясе”н аның кече сеңлесе дип атады. Төп аерма – катнашучыларның яше 16дан артырга тиеш түгел.

“Кызыл келәм, кыйммәтле статуэтка һәм… Алисә”

Премия тапшыру тантанасында балаларга үзләрен чын йолдыз кебек хис итәр өчен барлык шартлар да тудырылган иде: лауреатлар башта кызыл келәмнән үтте, микрофон формасындагы кыйммәтле статуэтка, диплом белән бүләкләнде, ә аннан соң танылган җырчылар белән бер сәхнәдә чыгыш ясады. Сәхнә белән дус булган һәр баланың хыялы ич бу! Кызганыч, бу кичәдә бары тик 15 баланың гына хыялы чынга ашты. Ләкин барысы да әле алда: оештыручылар премиянең киләсе елларда да уздырылачагын әйтте:

– Моңа кадәр без ел саен тамашачы күңеленә хуш килгән “Балалы солянка” концертын уздыра идек. Танылган җырчылар үз балалары белән җырлады. Ел да бер үк тамаша булмасын өчен, быел без форматны бераз үзгәртергә уйладык. “Балалар премиясе”ндә ел дәвамында “ТMTV” телеканалында барган “Балалы солянка” тапшыруының иң сәләтле егет-кызлары катнаша. Киләчәктә әлеге проектта катнашу өчен, әти-әниләргә үз балаларының  татар җырларын, биюләрен, уен коралларында татар халык көйләрен башкарган  видеосын җибәрү дә җитә, – дип аңлатты “Барс-рекордс” компаниясенең үсеш һәм инновацияләр буенча директоры Динә Гәрәева.

“Балалар премиясе” лауреатлары: Җәмилә Әсәдуллина, Айза Галиева, Милина Хәйруллина, Азалия Хәйруллина, Раяна Миңнегалиева, “Веснушки” вокаль ансамбле, Лерия Гәйфетдинова, Раяна Ибатуллина, Карина Нәбиуллина, Аслан Миргаязов, Амелия Феофанова, Наилә Славина, Азалия Яфясова, Әминә Әхмәтҗанова, Зәлия Зиннурова.

– Без премия лауреатларын аермаска тырыштык, барысын да тигез бәяләдек. Билгеле, араларында башкалардан аерылып торучылары да бар, әмма алар әле кечкенә, күңелләрен төшерәсебез килмәде. Иң беренче чиратта, балаларның сәләтен үстерергә кирәк. Кем белә, бәлки ун елдан без аларның концертларын тамаша кылырбыз. Ә мондый проектлар яшь башкаручыларның татар телен белү дәрәҗәсенә дә йогынты ясый. Татарча җырлаучы балаларга игътибар биреп, аларны үсендереп тормасаң, киләчәктә алар гел калмаска мөмкин бит, – диде премия турында Динә Гәрәева.

Кызыл келәмнән кызы Зәлия Зиннурова белән үткән Зөлфәт Зиннуров та әлеге фикер яклы:

– Мул уңыш, татлы җимеш алыйм дисәң,  зур көч, хезмәт куеп, балага яхшы тәрбия бирергә кирәк. Балаларда югарылыкка, сәнгатькә омтылыш, татар телен өйрәнүгә кызыксындыру уятканнары өчен оештыручыларга бик рәхмәтле без, – диде ул.

Концертка килгәндә, аны Рамил Шәрәпов, Зәлия Зиннурова, Аслан Миргаязов һәм Әминә Әхмәтҗанова алып барды. “Интернет балалары” катнашкач, алып баручыларга виртуаль ярдәмче – Алисә дә (“Яндекс.Алиса”ның татар туганы) булышты. Алып баручыларның да (Рамил Шәрәповны исәпкә алмаганда) уңышлары күп булып чыкты. Рамил абыйларын алар: “Борчылма, тырышсаң, син дә безнең кебек булырсың”, – дип тынычландырды.

Аерым чыгышларга тукталсак, алар, концертта катнашкан балалар кебек үк, һәркайсы үзенчәлекле иде. Тамаша башлануга ук, сабый гына булсалар да, “шоу” төшенчәсен яхшы белә торган балалар җыелган икән монда, дигән уйлар килде.

Шәхсән үзем “сәхнә өчен туган”нар исемлегенә Аслан Миргаязов, Азалия Яфясова, Наилә Славина, Зәлия Зиннурова, Раяна Ибатуллина һәм Җәмилә Әсәдуллинаны кертер идем. Концертны тамаша кылганнар килешер, Иркә, Филүс Каһиров, Гүзәлем, Лэйна, Илнат Фәрхулин белән дуэт башкарган әлеге йолдызчыкларның чыгышлары аеруча истә калырлык булды.  “Кечкенә принцессалар” арасындагы бердәнбер кечкенә баһадир Аслан Миргаязов кичәнең төп герое булды дисәм, бер дә ялгышмам. Динә Гәрәева концерт башланганчы: “Кайбер катнашучылар танылган җырчыларны да уздыра”, – дигән иде, расладылар, шәт.

Моңа кадәр уздырылучы “Балалы солянка” традицияләрен истә тотып, “Балалар премиясе” сәхнәсендә кызы Таңсылу белән Ләйсән Гимаева, Данир һәм Мәрьям Сабировлар, гаиләсе белән Илназ Баһ, Ризат һәм Айгизә Рамазановлар, улы Акбулат белән Зәйнәб Фәрхетдинова да чыгыш ясады.

Лилия Гыймазова

 


Фикер өстәү