«Абилимпикс» илкүләм чемпионатында җиңгән Айзилә Фәйзрахманова: «Мин үземне ничек бар шулай кабул иттем, беркемнән дә читенсенмим»

Буа ветеринария техникумының 2 курс укучысы Айзилә Фәйзрахманова физик мөмкинлеге чикләнгән кешеләр арасында узучы «Абилимпикс» илкүләм чемпионатында Татарстанда – беренче, Россия буенча икенче урынны яулаган. Ул «Икътисад һәм бухгалтерия исәбе» юнәлешендә ярышкан.

– Буа районының Күл Черкене авылында туып үстем. Әтием Ирек – Буа драма театры хезмәткәре, әнием Гөлнара – хуҗабикә. Без гаиләдә ике бала үстек. Апам Адилә кияүдә, ире белән ике бала үстерәләр. Мин исә тугызынчы сыйныфтан соң Буа ветеринария техникумына укырга кердем. Баштарак Казанга китмәкче идем. Әмма зур, шау-шулы шәһәр миңа ошамады, районда калдым. Баштарак әллә дөрес җиргә укырга кермәдем инде дип уйлаган идем, аннары бу уйларым юкка чыкты. Белем ала башлагач, үземә кирәкле һөнәре сайлаганымны төшендем. Техникумда тагы ел ярым укыйсым калды. Мин монда гел «бишле»гә генә укыйм, – дип сөйли Айзилә.
Узган җәй икътисад буенча укытучысы Алсу Уразова Айзиләне узган җәй «Абилимпикс» бәйгесендә катнашырга чакыра. Әкренләп әзерләнә башлыйлар. Кыз җиңү турында уйлап та карамый. Әмма Лениногорскидан җиңү яулап кайту ул.
Техникум директоры Илдар Гыйниятуллин Айзиләнең зур җиңүе хакында бик канатланып сөйли.
– Техникум укучылары ел саен диярлек төрле россиякүләм бәйгеләрдә җиңеп, безне сөендереп торалар. «Ворлдскиллс» бәйгесендә безнең укучы, Сахалинга барып, беренче урынны яулап кайтты. Айзилә дә молодец! Чит җиргә барып, ике призлы урын алып кайтсын әле! Аны әзерләгән укытучысына да зур рәхмәт, – ди ул.
Узган атнада Айзилә Президент белән очрашты. Рөстәм Миңнеханов аларны чәйгә җыйды.
– Ярышка баруга караганда, Рөстәм Миңнеханов белән очрашуга барганда ныграк борчылдым. Әмма үзен күргәч, аның безгә булган җылы мөнәсәбәтен сизгәч, бар борчулар юкка чыкты. Ул безнең барыбыз белән дә танышып чыкты. Барысын да сорашты, рәхмәт белдерде, – ди Айзилә.
Кыз башкаларга охшамаган. Әмма үзе әйтмәсә авыру икәнен белмисең дә! Айзиләнең кечкенә вакытта буыннары чыгып тилмерткән. Хәзер дә аяклары авырткалый икән. Әмма ул зарланмый.
– Мин үземне ничек бар шулай кабул иттем. Беркемнән дә читенсенмим. Шөкер, авыруым «кычкырып» тормый. Миңа комачау да итми. Шулай булгач, мин күңелемне төшереп тормыйм. Иң мөһиме – күңелемә рәхәт. Булганына сөенеп яшәргә тырышам. Бу җирдә яшәвемә шатланам. Әти-әниемә чиксез рәхмәтлемен, – ди ул.
Киләчәктә техникумны тәмамлагач, югары уку йортында үз белгечлеге буенча укуын дәвам иттермәкче. Һәр яшь кыз кебек аның да матур гаилә корасы, балалар үстерәсе килә. Тик аңарчы әле эшкә урнашып, күңелдә йөрткән хыялын чынга ашырасы бар.
Сөйләшә торгач, Айзиләнең җырга-моңга оста икәнлеге дә ачыкланды.
– Буш вакытымда төрле бәйрәмнәрдә, техникумда узган чараларда җырлыйм. Безнең әти дә өйдә гел моңланып йөри. Апам да иҗатка гашыйк. Ул шигырьләр яза, җырлый да. Әмма беребезнең дә зур сәхнәгә чыкканы юк. Әлегә һөнәрем буенча эшкә урнашып, акча туплыйсым килә. Аннары инде сәхнәгә чыгарга хыялланам, – ди Айзилә.– Бәйгегә килгәндә, әгәр тагын катнашырга кушсалар, бик теләп барыр идем. Инде хәзер оялып та, куркып та тормас идем. Республикада үз һөнәрең буенча осталыгыңны күрсәтергә мөмкинлекләр бар. Әлбәттә, студентларга мондый чаралар канат куя. Үз-үзеңә ышаныч арта. Тагын да күбрәк беләсе, өйрәнәсе килә. Миңа ныклы белем биргән укытучыларыма, аеруча Алсу Уразовага бик зур рәхмәт. Ул, миндәге сәләтне күреп, ярдәм итте. Үземнең яшьтәшләремә дә киңәшем бар: күңелегезгә каршы килмәгез. Хыяллар уйламаганда чынга аша!

Гөлгенә ШИҺАПОВА