25 гыйнвар – студентлар көне. Студент еллары күңелегездә ничек истә калды? Бу вакытларны сагынасызмы?
Җәвит Шакиров, Татарстанның халык артисты:
– Ничек сагынмыйсың ди? Ул бигрәк тә тулай торактагы кызыклы вакыйгалар белән истә калган. Суыткыч юк. Ит яки башка ризыкларны урам ягына элеп куябыз. Аның өзелеп төшкән чаклары да була иде. Вакытында төшәргә өлгермәсәң, кошлар чукый башлый. Чиратлашып ашарга пешердек, бүлмәне җыештырдык. Мәрхүм Әбүкәрамның беркайчан да идән юганы булмаган икән. Бер чиләк су сипкән дә, нишләргә белмичә карап тора. Вакытында суны җыеп алмасаң, идән бүртә башлый бит. Мин дә аптырап тормадым, ничек түктең, шулай җыештыр, дидем. Менә шуннан соң идән юарга өйрәнде. Бервакыт бер бүлмәдә яшәүче Таһирның апасы килде. Бик зур авыл тавыгы алып килгән. Без укырга киттек, ул пешереп калды. Берзаман пешереп бетерсә, кәстрүлдә тавыктан җилләр очкан. Апасы бик читенсенде, без тәмле шулпа ашадык. Бу вакыйгалар Стәрлетамакта училищеда укыганда булган иде.
Данил Сәфәров, журналист:
– Студент еллары бик тыгыз вакыт икән ул. Укыйсы да бар, иҗат та кайный, борынга кызлар исе дә кергән чак. Барысына өлгер генә (көлә). Шунысы белән кызык та инде ул. Җаваплылык та бик көчле. Мәктәптә сине кулыңнан җитәкләп йөртсәләр, югары уку йортында башкача: сине куып чыгарсалар, институт ых та итмәячәк. Мин билге өчен, кызыл диплом өчен йөрмәдем. Үземә кызык дәрескә теләп бардым, кызык булмаган дәресне тартып суздым. Лекциядә профессорыбыз Илдар абый Низамов белән телләшеп, бәхәсләшеп утыра идем. Ул да моны ярата иде. Диплом алганга киләсе елга 20 ел була. Илдар абый белән әле дә аралашабыз. Барлык остазларыбызга бик зур рәхмәт!
Люция Алиева, блогер:
– Казан кызы булгач, тулай торакта яшәргә туры килмәде. Студент вакытта кызыклы вакыйгалар шактый булды. Казан дәүләт финанс-икътисад институтында укыганда ирем Айдар белән таныштым. Икенче курстан соң башка юнәлешне сайлап була иде. Мин башта бер төркемгә күчтем. Анда ошамагач, ректор янына кереп, башкасына күчерүне сорадым. Иптәш кызым шунда укый иде. Менә шунда булачак тормыш иптәшем белән очраштык та инде. Лекция вакытында мөгаллимгә сиздермичә, Айдарның сүтелгән чалбарын теккән чаклар да булды.
Зилә Вәлиуллина, җәен комбайн ярдәмчесе булып эшләүче студент:
– Мин Казан халыкара сервис көллиятендә кунакханәдә хезмәт күрсәтү бүлеген тәмамладым. Хәзерге вакытта Мәскәү финанс-сәнәгать институтында читтән торып укыйм. Чагыштырганда, аерма – җир белән күк арасы. Онлайн укыганда сабакташларыңны да белмисең. Көндез уку бик рәхәт һәм күңелле. Студент вакытта ыштан туздырып йөрмәдем. Кушкан бар нәрсәне дә үти идем, төннәр буе укуга әзерләндем. Фатирда яшәдем, ашау буенча проблема булмады. Авылдан әти-әниләр ризыкларны җибәреп торды. Көллияткә пропуск белән генә кертәләр иде. Онытып калдырган чакта, өйгә кайтып ала идек. Менә монысы бер дә рәхәт түгел иде. Практиканы исә кунакханәдә үттек. Минем өчен иң кызыгы – чит илләрдән килгән танылган спортчылар белән танышу. Футболчыларга үзебезне кызыксындырган сорауларны бирә идек.
Сәрия Мифтахова сораштырды
