«Формула еды» тапшыруы хәбәрчеләрен дә кызыксындырган Балтач сыры белән мае нәрсә белән ота?

Балтачның сыры да, мае да данлыклы. Сәбәбе нидә? Россия үзәк каналларының берсендә популяр булган «Формула еды» тапшыруы хәбәрчеләре дә, күптән түгел бирегә килеп, шул сорауга җавап эзләгән. Алар йөргән эздән без дә танышып чыктык.

2007 елгы реконструкциядән соң комбинатта чын мәгънәсендә зур үзгәреш-яңалыклар булган. Биредә хәзер бөтен җиһаз-җайланма чит илнеке. Барлык линияләр автоматлашкан. Биредә җитештерелгән сырларның күпчелек өлеше Мәскәү, Санкт-Петербург кебек илнең иң зур ике шәһәренә китә икән, анда үз сатып алучыларын күпләп тапкан икән, шушы бер факт кына да күпне сөйли.
Бүген сәгатенә 60 тонна сөт кабул итәргә сәләтле бу комбинат. Сөт кабул итү пунктындагы заманча лабораторияләре 1 минут эчендә сөтнең әллә ничә төрле анализын әзер итә. Бөтен анализ шул минутта ук экранга чыга. Хәзерге вакытта биредә көн саен 300 тонна сөт эшкәртәләр. Җәен бу сан 350–400 тоннага кадәр җитә. Шушы кадәр сөтне кабул итеп, эшкәртеп, калдыксыз технология белән эшләп, биредә күп төрле сыйфатлы продукция чыгаралар. Чыгаралар дип әйтергә генә җиңел. Әзер продукция булганчы сөтнең үткән юлын үз күзе белән күргән һәркем гаҗәпкә калыр иде. Бер линиядә тозлы бассейнга баручы сырлар сәяхәт итә, икенчесендә юылучылары, өченчесендә – пресска, дүртенчесендә төрелергә баручылар… Бер яктан салкын су, бер яктан җылы су, бер яктан пар килә (тулы бер куәтле котельныйлар системасы эшли). Аларның барысының да сөттән төрле, сыйфатлы продукцияләр алуда үз роле бар.
Тагын шунысы игътибарга лаек: биредә кул хезмәте бөтенләй юк диярлек, фәкать әзер сырларны линиядән алып торырга гына кирәк.
Биредә өч төрле формада 16 төрле сыр гына җитештерелә. Аларның өлгерү көннәре дә төрлечә: 20–45 көннән алып, ике ай, алты айдан-бер елга кадәр өлгерә торганнары бар. Айга 30 тонна сыр, 12–15 тонна май җитештерсәләр дә, аларны вакытында урнаштырып баралар.

Гөлсинә Хәбибуллина