Республика юлларында аварияләр, корбаннар һәм имгәнүчеләр азайган. Саннар кими, әмма тынычланырга ярыймы? Юл куркынычсызлыгын тәэмин итү буенча Хөкүмәт комиссиясе утырышында юллардагы иминлек, М12 трассасы һәм башка мәсьәләләр турында фикер алыштылар.
Кимесә дә, бетмәгән
– Юлларда елына 800–900 кеше һәлак булган вакытларны да хәтерлибез. Ул вакытта транспорт та бу кадәр күп түгел иде. Әмма бер генә кеше үлгән очракта да, без моның өчен җаваплы. Халык күзенә карарга оялмаслык күрсәткечләргә җитәргә кирәк. Бурычыбыз шул, – диде утырыш башында Татарстан вице-премьеры, комиссия рәисе урынбасары Шамил Гафаров.
2020 ел саннарын исә Татарстанның ЮХИДИ башлыгы Ленар Габдрахманов җиткерде. Узган ел 4017 юл-транспорт һәлакәте теркәлгән, шуларда 331 кеше һәлак булган, 4989 кеше имгәнгән. 2019 ел белән чагыштырганда, һәлакәтләр саны – 508, корбаннар 38гә кимегән. Имгәнүчеләр саны да 721 кешегә азрак. Шул исәптән балалар, җәяүлеләр, юлга әле яңа чыккан тәҗрибәсез йөртүчеләр катнашында булган һәлакәтләр саны да кимегән. Шул ук вакытта, Ленар Габдрахманов сүзләренчә, Чаллы, Әгерҗе, Әлмәт, Азнакай, Арча, Биектау, Чүпрәле, Яшел Үзән, Лениногорск, Минзәлә, Мөслим, Питрәч, Саба, Теләче районнарында үлүчеләр саны арткан. Юл-транспорт һәлакәтләренең 1801е – бәрелү, 1128е җәяүлене бәрдерү белән бәйле.
2021 елның гыйнвар нәтиҗәләре дә куандырырлык түгел. Юлларда балалар катнашында 31 юл-транспорт һәлакәте булган. Кызганыч, 3 баланың гомере өзелгән. Ә 2020 елда балалар катнашындагы 470 авария очрагы теркәлгән, шуларда 9 бала һәлак булган, 501е төрле дәрәҗәдә имгәнгән.
Юллардагы иминлекне тәэмин итү чараларына килгәндә, 2020 елда 34 урында светофор куелган, 70 җәяүлеләр кичүе ясалган, 680 берәмлек мәҗбүри тизлекне киметү җайланмасы урнаштырылган, 12 чакрым тротуар салынган.
Телевизордан күргәч, оялырлар
Исерек машина йөртүчеләр, чистартылмаган юллар – кеше үлеменә китерүче сәбәпләр исемлегендә шулар тора икән. Әлбәттә, сәрхушләр аркасында килеп чыккан һәлакәтләр – иң киң таралганы. Авариядәге һәр дүртенче үлем очрагы – шуның аркасында. Узган елны шул сәбәпле 392 авария теркәлгән, 87 кешенең гомере өзелгән, 500дән артыгы яраланган. Бу елның гыйнварында гына да исерекләр аркасында 7 юл-транспорт һәлакәте килеп чыккан. Анда бер кеше үлгән.
Кайбер районнарда исерекләр катнашында аварияләр күрсәткече артып киткән. Аеруча Әгерҗе, Аксубай, Әлки, Әлмәт, Арча, Бөгелмә, Чүпрәле, Алабуга, Зәй, Кайбыч, Лениногорск, Мөслим, Сарман, Тукай, Тәтеш, Теләче, Чирмешән районнарында һәм Казанда сизелерлек арткан.
Вице-премьер телевидениедә исерек килеш машина йөртү аркасында тоткарланган кешеләрне күрсәтергә кирәк дигән фикердә. Оялырга, акылга килергә, бәлки, шул мәҗбүр итәр.
– Күз алдыгызга китерегез: район җирендә андыйларны телевизордан ике мәртәбә күрсәтәчәкләр. Бу бит – хурлык! Бер генә тапкыр түгел, атна буе күрсәтергә кирәк, – дип киңәш итте Шамил Гафаров.
Утырышта кышкы юлларны чистарту турында да сөйләштеләр. Баксаң, дәүләт килешүләрен кайбер районнар декабрьдә генә төзи. Бу эшне исә октябрьдә үк башкарырга кирәк. «Ярты кыш узгач кына килешүләр төзелә. Районнарга чыгып бу хәлне тикшерергә була. Аңа кадәр юлны кем чистарткан?» – дип гаҗәпләнде Шамил Гафаров.
Хәстәрен алдан күрсеннәр
Утырышта М12 трассасын төзү мәсьәләсе дә каралды. Шамил Гафаров искәрткәнчә, бу зур төзелеш республикага күбрәк транспортны җәлеп итәчәк һәм трасса узачак районнарда үзгәрешләргә алдан әзерләнеп кую хәерле. Юл хәрәкәте иминлеген тәэмин итү өчен полициянең эшен дә көчәйтү кирәк булмагае. Вице-премьер төзелеш эшенә дә әзерлекне башларга кушты. Материаллар, эшчеләр өчен торак урыннар булдыру турында кайгыртырга кирәк икәнен искә төшерде ул.
САН
2020 елда Россиядә барлыгы 145073 юл-транспорт һәлакәте теркәлгән (Идел буе федераль округында – 31970). Ил күләмендә карасаң, барлыгы 16152 кеше үлгән (Идел буе федераль округында – 3294).
2021 елда Татарстан Транспорт һәм юл хуҗалыгы министрлыгы 55,5 км юл, бер юлүткәргеч, 6 күпер төзергә, 145 км юл һәм 5 күперне төзекләндерергә тиеш.
Чулпан Гарифуллина
Илдар Мөхәммәтҗанов фотосы
