Татарстанның Әлмәт һәм Зәй районнарында кыргый кабаннар арасында Африка дуңгыз чумасының тагын ике чыганагы ачыкланган. Татарстанның Премьер-министр урынбасары – авыл хуҗалыгы һәм азык-төлек министры Марат Җәббаров сүзләренчә, вазгыять катлаулы.
– Республикада вазгыять киеренке, – дип җиткерә министрның сүзләрен министрлыкның матбугат үзәге. – Әлмәт һәм Зәй районнарында кыргый кабаннар арасында тагын 2 чыганак ачыкланды. Барлыгы 6 чыганак теркәлгән.
Шулай итеп, бүгенгә өч район – Алабуга, Зәй һәм Әлмәт имин булмаган район дип санала. 100 километрлы зонага республика территориясенең яртысыннан артыгы эләгә. Кыргый кабаннар аркасында вирусның тагын да таралу куркынычы бар.
Министр әйтүенчә, бүгенге вазгыять авыл хуҗалыгы предприятиеләрендә, крестьян (фермер) хуҗалыкларында, шәхси ярдәмче хуҗалыкларда дуңгызларның күпләп үлүенә сәбәп булырга мөмкин, бу зур финанс югалтуларына китерәчәк һәм республиканың азык-төлек иминлегенә куркыныч яный.
Министрлар Кабинетының Баш ветеринария идарәсе башлыгы Алмаз Хисаметдинов кабаннарны атуны дәвам иттерергә кирәк, дип саный. Чөнки имин булмаган пунктлардан кабаннар башка территорияләргә күчеп, инфекциянең тагын да күбрәк таралуы мөмкин. Әлмәт һәм Зәй районнарындагы соңгы очраклар – моңа мисал.
– Безнең төбәк территориясендә кыргый кабан дуңгызлары арасында Африка чумасы вазгыятен мониторинглау дәвам итә. Республика ветеринария лабораториясенә, Татарстан төбәкара ветеринария лабораториясенә көн саен районнардан атылган кабаннардан алынган пробалар килә. 2020 елның 1 гыйнварыннан бирле 7793 проба, шул исәптән агымдагы ел башыннан 2216 проба тикшерелде, – диде ул.
Марат Җәббаров республикага Африка чумасы вирусы таралуга юл куймау буенча үткәрелә торган профилактик чараларны көчәйтергә кирәклеген ассызыклаган һәм катгый үтәлергә тиешле эшләрне әйтеп узган. Алар түбәндәгеләр:
– куркыныч яный торган 1 зонада кабаннар санын 1000 гектарга 0,25кә кадәр киметү чараларын башларга;
– районнарда гадәттән тыш хәлләр буенча комиссияләр утырышларын үткәрергә;
– дуңгызчылык предприятиеләренә, терлекләрне тотуның барлык ветеринария-санитария кагыйдәләрен үтәп, ябык режимда эшләүне тәэмин итәргә;
– авыл җирлекләре башлыкларына: вирус таралу куркынычы булу турында халыкны кисәтергә;
– шәхси ярдәмче хуҗалыкларда дуңгыз асраучы гражданнарга урманнарга барып йөрмәскә, термик эшкәртү узмаган азык-төлек калдыклары белән тукландырмаска;
Йорт дуңгызлары үлгән һәм кабан дуңгызлары үләксәләре табылган очракта, ветеринария хезмәтенә кичекмәстән хәбәр итәргә кирәк.
Фото: pixabay.com
