Яңа теле ачылган сабыйдан алып – сиксәнен тутырган агайга кадәр. Татарстан Президенты каршындагы Татар телен саклау һәм үстерү мәсьәләләре комиссиясе ярдәме белән оештырылган бәйгедә төрле яшьтәге 4 меңгә якын кеше катнашкан. Соңгы турга шуларның 31е килеп җиткән. Ниһаять, җиңүчеләр ачыкланды. Бу бәйге ни өчен кирәк дигән сорауга да саллы җавап табылды.
Генофондыбызның көченә тагын бер кат инаныр өчен кирәк иде. “Tatar сүзе”нең жюри рәисе, Габдулла Тукай исемендәге Татар дәүләт филармониясенең сәнгать җитәкчесе Айдар Фәйзрахманов ни өчен кирәк дигән сорауга әнә шулай җавап бирде:
— Беренче коймак төерле була, дип әйтергә яратабыз. Әмма бу “Tatar сүзе”нә бөтенләй туры килми. Чөнки “Tatar сүзе” бүген генә пешкән коймак түгел, ул гасырлар буе әзерләнгән, сакланган һәм бүгенге көнгә килеп җиткән. Гала-концертта без аның бөтен камил ягын күрсәтергә тырыштык. Ул шулай килеп чыкты да. Безнең генофондыбыз бик көчле һәм без аны беркайчан да югалтмаячакбыз – мин әнә шуңа тагын бер мәртәбә инандым.
Дөрес, бәйге өстәмә категорияләр кирәклеген дә күрсәтте. Әйтик, автор-башкаручылар категориясе. Бәйгене гамәлгә куйган комиссия җитәкчесе Марат Әхмәтовка әлеге тәкъдимне ясарбыз дип уйлыйм. Болай без татар сүзенең колачын тагын да арттырачакбыз.
Җиңүчеләр арасында 13 яшьлек Тимур Фазлыев та бар иде. Мөмкинлекләре чикләнгән бу бала җырлый да, сәнгатьле сүз дәресләрен дә ала икән. Аны тыңлаганда күзләре яшьләнмәгән берәр кеше калдымы икән залда? Ул шулкадәр тәэсир итте, соңыннан сәхнәгә күтәрелгән Марат Әхмәтов тамашачы арасында Тимурга ярдәм итәргә әзер иганәче барлыгын әйтте:
— Тимур Фазлыев дигән егетебез чыгыш ясады. Бәйрәм кунакларының берсе – игелекле иганәчебез , исемен әйтмәскә кушты, Тимур дигән егетебезгә үзе йөри торган электр коляскасы бүләк итик әле, дигән тәкъдим ясады. Якын арада аның үзенә ошый торган иң яхшы тәгәрмәчле җиһаз өенә барып җитәр. Тормышында юанычлары күп булсын. Аңа көндә тормыш белән көрәшергә кирәк , ул аның өстенә шигърият белән, иҗат белән шөгыльләнергә көч таба. Менә нинди көчле ул, безнең татар халкы!
Сәхнәгә, олы булсынмы ул, баламы, берсе дә очраклы кеше түгел. Аларның һәрберсе сүзнең тәэсир көчен белә, алар үзләре сайлаган әсәр эчендә яши. Бигрәк тә балалар чыгышлары тәэсирләндерде. Бала бит ул ясалмалыкны белми дә, күтәрә дә алмый. Алар белән шөгыльләнгән педагогларга рәхмәт. Шундый остазларның берсе – Әтнә районы Олы Мәңгәр авылыннан Рафис Сәлахетдинов. Ул күптән түгел генә авылларында «Әкият иле» курчак театры оештырган:
— Чөнки курчаклар белән балага тәэсир итү җиңелрәк. Ул хыяллана, курчаклар белән идарә итәргә өйрәнә, әдәби әсәрләр ярдәмендә тәрбияләнә.
Аның тыңлаганда, Әтнәдә телнең кадерсезләнмәячәгенә инанасың. Шул ук вакытта әлеге бәйгегә татар теле аянычлы хәлдә калган районнарның балалары да катнашсын иде, дигән теләктә каласың. Әйтик, “Йолдызлык” фестивале һәр район өчен гадәти мәҗбүрият. Ә ни өчен “Tatar сүзе” дә шундый ук гадәткә әйләндермәскә?
Комиссия рәисе Марат Әхмәтов әлеге фикерне куәтләп, һәр көнне – туган тел көне, дип яшик, шул чакта киләчәгебез өметле булыр диде:
— Рухи бушлыкны берникадәр тутытырга тырышып, бик күп чаралар үткәрәбез, бик күп очрашулар үткәрдек, эзләнәбез, шушы максаттан дистәләгән конкурслар, грантлар барлыкка килде. Республикабызның бик күп мәдәният оешмалары, матбугат чаралары белән уртак проектлар булдырдык һәм киләчәктә дә без бу эшне дәвам итәчәкбез. “Тatar сүзе@ бәйгесе – игълан ителгән гамәлдәге иң отышлы һәм иң колачлы бәйгеләрнең берсе. Без бу бәйгедән уңдык һәм оттык дип саныйм. Искиткеч матур чыгышлар карадык сезнең белән. Әйтеп үткәнчә, 4 меңгә якын телгә игътибарлы милләттәшебез бар икән, димәк татар телнең киләчәге өметле дигән сүз. Милләтебез, халкыбыз, телебез яши. Ә без һәр яшәгән көнебезне менә бүенге көн кебек, туган тел көне кебек яшик әле. Шулай булса, илебез, көнебез киләчәктә бәхетле булыр.
Халыкара туган тел көнендә яңа бәйге дә игълан ителде. Марат Әхмәтов бу хакта менә ниләр сөйләде:
— Тормыш туктамый, бәйге дәвам итәргә тиеш. Яңадан шушындый бер бәйге, филармония җитәкчелеге, автор башкаручылар бәйгесе дип әйтәләр, бер матур зур бәйгегә яңадан башлангыч бирәбез. Якын көннәрдә нигезләмәсе халыкка җиткерелер.
“Тatar сүзе” бәйгесе җиңүчеләре:
0 — 10 яшь категориясендәге катнашучылар арасында:
Шигърият:
- I урын – Дилә Сибагатуллина
- II урын – Таңсылу Сәлахова, Сәфинә Гарифуллина, Нәргизә Хәбибрахманова
- III урын – Сәйдә Хәсәнова
- Кызыксындыру премиясе – Дилә Хисамова
Проза:
- I урын – Нәргизә Сабирҗанова
- II урын – Зилия Әскарова
- III урын – Раил Мәрданов
Мәсәл:
- I урын – Мәръям Зәкиева
- III урын – Нәфисә Ибраһимова
11 -17 яшь категориясендәге катнашучылар арасында
Шигърият:
- I урын – Тимур Фазлыев, Айзат Хәйруллин
- II урын – Данис Хисмәтуллин, Айрат Шамс
- III урын – Камилә Ганиева, Раяз Сәлахетдинов
Проза:
- III урын – Алсу Вәлиева
Мәсәл:
- III урын – Айсылу Абдуллина
18 яшь һәм өлкәнрәкләр категориясендәге катнашучылар арасында
Шигърият:
- I урын –Тамчыгөл Сәлахова
- II урын – Эльвира Камалетдинова
- III урын – Гүзәл Сибагатова
Проза:
- I урын – Рания Усманова
- II урын – Гөлчәчәк Камалиева
- III урын – Фоат Заһриев
Мәсәл:
I урын – Илдар Динмөхәммәтов
II урын – Гүзәл Шакирова
III урын – Дилбәр Гайнуллина
«Профессионаллар» категориясендәге катнашучылар арасында
(Нигезләмә шартлары буеннча, әлеге категория катнашучылары арасында номинацияләргә бүленеш юк)
- I урын – Г.Камал театры артисты Фәннүр Мөхәммәтҗанов
- II урын –диктор, журналист Идел Кыямов
- III урын – Әлмәт драма театры артисты Мәдинә Гайнуллина
Җиңүчеләрне котлыйбыз, уңышлар теләп калабыз!
Гөлинә Гыймадова
Ханнанова ЭльмираЛяля Рамазановнанын тортлары хэм ижади унышлары ,кондитер осталыгы Ватаным Татарстан газетасына яналык булып бик лаек язарга!)Кондитер остасы Ләлә Фәйзуллина: «Беренче тортымны 8 яшьтә пешердем»
Загрузка ...
