Рөстәм Миңнеханов “Татнефть”нең директорлар советы утырышын уздырды

Казанда Татарстан Президенты Рөстәм Миңнеханов рәислегендә “Татнефть” гавами акционерлык җәмгыятенең директорлар советы утырышы узды. Анда компаниянең гыйнвар аендагы бюджеты үтәлешенә йомгак ясалып, март аена бюджеты расланды.

Директорлар советында иң элек 2020 елда нефть чыгару буенча чикләүләр һәм пандемия аркасында кайбер проектларны тормышка ашыруның вакыты күчерелү шартларында инвестицион программаны үтәүгә багышланган чыгыш тыңланды.
Совет утырышында катнашучылар коронавирус пандемиясе таралуын кисәтү һәм аның аянычлы нәтиҗәләрен йомшарту максатында, “Татнефть” тарафыннан күрелгән чараларны игътибарга алды. Компания тарафыннан хезмәткәрләрнең иминлеген булдыруга, медицина учреждениеләре һәм ашыгыч хезмәтләргә ярдәм итүгә, шулай ук халыкны социаль яклауга юнәлдерелгән чаралар гадәттән тыш хәлләр килеп туган шартларда тиз генә карарлар кабул итү күнекмәләренә өйрәнү, компаниянең үзаңын һәм культурасын арттыру мөмкинлеге биргән. Бу юнәлештәге эш алга таба да дәвам итәчәк.
Директорлар советында төбәктә икътисади һәм социаль проблемаларны киметү, сервис предприятиеләрендә ярдәм итү өчен “Татнефть” тарафыннан күрелә торган чаралар турында да сөйләп үтелде. Компания ОПЕК+ чикләүләрен алу яки аларны йомшарту очрагында нефть чыгаруны тиз генә торгызу һәм үстерү максатыннан, 2020 елның икенче яртыеллыгында скважиналарны бораулау һәм капиталь төзекләндерү буенча өстәмә инвестицион программаларны гамәлгә ашырган. Нәтиҗәдә 488 мең метр озынлыкта тау токымнары борауланган, 478 скважина төзелеп, файдалануга тапшырылган. 2020 елда җирле подряд оешмаларын җәлеп итү нигезендә планлаштырылган эшләрне башкару 7 меңнән артыграк кешене эш белән тәэмин итү мөмкинлеге биргән.
Директорлар советы утырышында компанияне тотрыклы үстерүгә ирешү кысаларында шәһәрләр һәм торак пунктларда иминлек, экологик тотрыклылыкны тәэмин итү юнәлешендәге чаралар да каралды. Моннан тыш “Тотрыклы шәһәрләр һәм торак пунктлар” максатын тормышка ашыру юнәлешләре, шулай ук аңа ирешү буенча “Юл картасы” хупланды.


Фикер өстәү