Яңа модельле китапханәләр төзелде, клублар яңартылды, мәдәният хезмәткәрләре укытылды – заллар гына буш булмасын. Татарстанның мәдәният министры «Мәдәният» илкүләм проектының республикада ничек эшләве һәм нинди җимешләр бирүе турында сөйләде.
«Мәдәният» илкүләм проекты 2019 ел башыннан бирле «Иҗади тирәлек», «Иҗади кешеләр», «Санлы культура» юнәлешләре буенча эшли. 2020 елда әлеге проектны Татарстанда гамәлгә ашыру 279 млн сумга төшкән.
– Бу әле сәнгать мәктәпләрен төзекләндерүгә бүленгән сумманы (250 млн сум) исәпкә алмаганда. Иң күп чыгымнар (261 млн сум) «Иҗади тирәлек» төбәк проектына тотылды. Проект кысасында 14 белем бирү оешмасы музыкаль инструментлар, җиһазлар һәм уку материаллары белән тәэмин ителде, Арча, Спас, Биектау районнарында модель муниципаль китапханәләр булдырылды, 12 авыл клубында төзекләндерү эшләре башланды, – дип сөйләде Ирада Әюпова Хөкүмәт йортында узган брифингта.
Заллар киңәя, биналар арта, ә кеше йөриме соң? 2020 елда Татарстанның мәдәният учреждениеләре 23 миллионга якын кешегә хезмәт күрсәткән. Бу ил буенча уртача күрсәткечтән 45 процентка югары икән. 2030 елга әлеге санны өч тапкыр арттырырга ниятлиләр. Министр сүзләренчә, төп бурыч – кеше санын гына кайгырту түгел, аларның чараларда катнашу дәрәҗәсен дә арттыру.
Тамашаларны өйдән чыгып йөрмичә карау мөмкинлеге дә арткан: бүген республиканың Арча, Спас, Мамадыш, Баулы, Алабуга районнарында биш виртуаль концерт залы эшли. 2021 елда, «Санлы культура» проекты кысасында, мондый заллар Чаллы һәм Әлмәт шәһәрләрендә дә ачылачак.
2022 елда Татарстанда тагын ике өр-яңа мәдәни үзәк эшли башлар дип көтелә.
– Быел Россиядә барлыгы сигез мәдәни үзәк төзелә. Шуларның икесе –Алабуга һәм Яшел Үзәндә. Алар ике елда төзелеп бетәр дип ниятлибез. Һәрбер объектның гомуми бәясе 200 млн сумга якын, – диде министр.
Мондый мәдәни үзәкләрдә концерт залларыннан тыш, музейлар, күргәзмә заллары да булачак.
Авыллар да «Мәдәният»сез калмаячак: Кукмара һәм Минзәлә районнарындагы өч авылда 200 урынлык клублар төзелә. Төзелеш эшләре ел дәвамында тәмамланыр дип көтелә.
2021 елда «Иҗади кешеләр»нең дә белемнәрен арттырырга ниятлиләр. Узган ел квалификация күтәрү үзәкләренә 1089 кеше җибәрелсә, быел чиратта 1101 белгеч тора.
Ирада Әюпова волонтерларга аерым тукталды. Аның фикеренчә, алар бүген игътибар үзәгендә.
– Пандемия сәбәпле, медицина өлкәсендә хезмәт итүче волонтерларыбызга бик зур хезмәт куярга туры килде. Алар бик зур игътибарга лаек. Безнең өлкәдә дә бар бит андый волонтерлар. 2021 елда «Мәдәният волонтерлары» программасында катнашучыларның санын тагын да арттырырга ниятлибез, – диде ул.
Лилия Гыймазова
Фото: «Татар-информ»
