Нәрсә бүләк итәргә? Бәйрәмнәр алдыннан бу сорау һәр икенче затны борчыйдыр. Тиздән бәйрәм булуын исәпкә алып, «Ни хәл?» сәхифәсе кунаклары – гүзәл затларыбыздан иң уңышлы һәм уңышсыз бүләкләр турында сораштык.
Ләлә Миңнуллина, Татарстанның халык артисты:
– Бүләккә күмелгән чакларымны бик хәтерләмим, әмма күңел халәтенә туры килгән бүләк алуның ничек рәхәт икәнен беләм. Күбрәк кызым сөендерә мине. Ул биргән һәр нәрсә кадерле! Хатын-кыз булгач, табигать бизәкләре – чәчәкләрне бик яратам. Чәчкәләргә мөкиббән булу каныбызга сеңгәндер инде безнең. Ә менә «Әй, бүген бәйрәм бит әле» дип, әллә кайда аунап яткан әйберне табып бүләк итсәләр, бер дә матур түгел. Андый бүләкләр чын күңелдән бирелми бит.
