Чаллының 11нче урта гомуми белем бирү мәктәбендә башкорт телен өйрәнә торган сыйныфлар ачылачак. Бу хакта «Челнинские известия» хәбәр итте.
1 сентябрьдән әлеге мәктәптә «Туган тел һәм әдәбият» фәне кысаларында башкорт теле укытыла башлаячак. Бер кабинет башкорт телен өйрәнү өчен махсус җиһазландырылган.
Белем бирү учреждениесе директоры Елена Мосолкова сүзләренчә, I һәм II сыйныф укучыларының әти-әниләре теләге буенча, рус, татар яки башкорт телләрен сайлый алачак.
Мәгариф оешмасы Башкортстан һәм Татарстан хөкүмәте арасындагы килешүне гамәлгә ашыру кысаларында база мәктәбе буларак билгеләнгән.
Әлеге сыйныфка эләгү өчен әти-әниләр гариза язарга тиеш. 11 мәктәптә башкорт телен белгән бер укытучы булуы да мәгълүм.