Бүген КФУда Дәүләт Думасының Мәгариф һәм фән комитеты каршында эшләп килүче балалар, яшьләрне физик яктан тәрбияләү һәм аларның сәламәтлеге мәсьәләләре буенча экспертлар советларының уртак утырышы узды. Парламентчылар, профильле министрлыклар һәм ведомстволар, фәнни бергәлекләр вәкилләре мәгариф системасында, шул исәптән инклюзив белем бирү өлкәсендә, законнарны камилләштерү мәсьәләләре буенча фикер алышты.
Экспертлар советларының утырышы Дәүләт Думасы Мәгариф һәм фән комитетының урта һәм югары белем бирү системасында укучыларны, студентларны тукландыру, медицина хезмәте күрсәтү, физик культура һәм спорт мәсьәләләре буенча федераль закон инициативаларын карап тикшерүгә багышланачак утырышы алдыннан уза. Татарстанның бу мәсьәләләрне карау өчен экспертлар мәйданчыгы итеп сайлап алынуы очраклы түгел. Дәүләт Думасының Мәгариф һәм фән комитеты рәисе урынбасары, Экспертлар советы кураторы Максим Зайцев билгеләп үткәнчә, Казан – Россиянең студентлар һәм спорт башкаласы. Шуңа күрә республика тәҗрибәсен илнең башка төбәкләренә дә җәелдерү мөһим. Депутат әйтүенчә, республика башкаласы студентлар мохитендә массакүләм чараларны оештыру һәм үткәрү буенча зур тәҗрибәгә ия. Шул ук вакытта республикада профессиональ спорт та, һәвәскәрләр спорты да нык үскән.
“Бүген мәктәпләрдә физик тәрбия бирү, студентлар спорты мәсьәләләре игътибар үзәгендә тора, – дип басым ясап әйтте Максим Зайцев. – Дәүләт моны нык кайгырта. Беренче чиратта, мәктәп укучыларының сәламәтлеген ныгытуга кагылышлы җитди закон инициативалары кертелде”.
Утырыш эшендә Дәүләт Советы депутатлары Людмила Рыбакова, Артем Прокофьев һәм Эдуард Шәрәфиев катнашты.
ЗуайраУраза вакытында Кан бирергэ туры килэ,ярыймыУраза турында 9 сорауга ҖАВАП
Загрузка ...
