Казан читендәге Осиново бистәсендә булган куркыныч вакыйга инде икенче көн социаль челтәрләрдә халык теленнән төшми. Мәктәптән кайтып баручы 11 яшьлек баланы этләр талаган. Балага операция ясаганнар, ул әле дә реанимациядә ята.
“Кешегә зыян салган хайванны яклыйлар, балалар тилмерә”
11 яшьлек малай өенә кайтканда юлны кыскарту өчен чокыр аша чыга. Этләр аңа шунда очрый. Канга баткан баланы узып баручылар күреп ала. Татарстанның Сәламәтлек саклау министрлыгының матбугат үзәге җитәкчесе Рания Садыйкова хәбәр иткәнчә, кичә аңа операция ясаганнар. Баланың таланган урыннары күп. Ул реанимациядә ята.
Осиново бистәсендә яшәүчеләр әйтүенчә, алар берәр күңелсез хәл буласын алдан ук сизенгән.
– Безнең бистәдә этләр көтүләре белән йөри. Кемдер чыгарып җибәргәнгә, сукбайга әйләнгәннәр бит инде. Кот очып тора иде. Әле ярый, балалар мәктәпкә үзләре генә йөрми. Әтиләре илтә, каршы ала. Эт талаган бала бездән ерак түгел генә яши. Ишеткәч, чәчләр үрә торды. Әле ярый кешеләр күреп коткарган. Исән калуына сөендек, – ди бистәдә яшәүче Лилия Ибраһимова. – Бөтен ялгышлык – этләрне яклауда. Кешегә зыян салган хайванны яклыйлар, балалар тилмерә. Сукбайлар этләрне тотып алып китеп, колагына тамга тагып җибәргән булалар. Алар нәрсә ашасын соң? Ач эт – усал эт. Аларны приютта тотарга кирәк. Шәһәргә чыгармасыннар иде.
Этләр тешләгән баланың әнисен дә эзләп таптык. Ул сөйләшә дә алмый. Күңеле тула.
–Табиблар төн буе балабызның гомере өчен көрәште. Әлегә кадәр улыбызны күрмәдек. Ничек авыр икәнен үзем генә беләм. Дарулар белән генә торам. Шөкер, балам аныңа килгән, – ди Ландыш.
Осиново бистәсе Яшел Үзән районына керә. Бүген иртән район башлыгы Михаил Афанасьев барлык авыл җирлекләренә хуҗасыз этләрнең санын барларга кушкан. Шулай ук ул этләрне приютта тотар өчен мөмкинлек табарга тырышачакбыз дигән.
Район хакимиятенең матбугат үзәге җитәкчесе Рәсим Хаҗиев әйтүенчә, ел башыннан районда 100ләп сукбай этне тотканнар.
– Закон кушканча, ул этләр стерильләштереп, кире урамга чыгарыла. Осиновода яшәүчеләрдән моңа кадәр дә, сукбай этләр күплеге хакында хәбәрләр килгән. Шуннан соң 20 этне тотканнар иде. Моның белән “Кот и Пес” оешмасы шөгыльләнә, – ди ул.
“Кот и пес” оешмасы хезмәткәре Максим Иванов, баланы этләр тешләгән урынга кичә дә, бүген дә барган. Аның сүзләренчә, сукбай этләр арасында бер хуҗалы эт тә булган.
– Мин анда яшәүчеләр белән сөйләштем. Хуҗалы этне урамга чыгарган булганнар. Бала аны сыйпамакчы булган, тегесе исә аңа ташланган дип тә әйтәләр. Аннары бу эт янына сукбайлар килеп кушылган. Этнең берсе тешләсә, калганнары килеп кушыла. Кычкырган тавышка ябышалар, – ди Максим.
Ни өчен сукбай этләрне приютта гына тотып булмый? Максим Иванов сүзләренчә, алар агрессив һәм авыру этләрне генә үзләрендә калдыра алалар.
– Дәүләт безгә акчаны тоткан өчен генә бирә. Приютта яшәтер өчен мөмкинлек юк, – ди ул.
Бу беренче генә очрак түгел. Күптән түгел Питрәч районының Шигали авылында этләр ир-атка ташланган иде. Куркыныч бар, белгечләр исә ни эшләргә белми аптырый. Закон буенча аларны атарга ярамый, хайванны җәберләгән өчен исә төрмәгә үк утыртып куярга мөмкиннәр. Әлеге проблема хакында тулырак язманы биредән укырга була.
Атарга түгел сакларга: Татарстанлылар сукбай этләрдән зарлана
Гөлгенә ШИҺАПОВА
