Казанда бүген Бөек Ватан сугышында Җиңүнең 76 еллыгына багышланган акция узды. Татарстан халыкларының Яшьләр ассамблеясе вәкилләре М.Горький исемендәге Мәдәният һәм ял паркында Билгесез солдат һәйкәленә чәчәкләр салды. Тантаналы чарада парламент башлыгы, Татарстан Халыклар ассамблеясе рәисе Фәрит Мөхәммәтшин катнашты.
«Бу акция Татарстан халыкларының Яшьләр ассамблеясе вәкилләре өчен традицион булды. Бу көнне без фронтка киткән һәм Бөек Җиңү хакына башларын салган ата-бабаларыбызны искә алабыз. Россия — күпмилләтле дәүләт. Телләр, традицияләр, гореф-гадәтләр аермасына карамастан, бу сугыш безне Ватанны саклау өчен дошманга каршы берләштерде», — диде Дәүләт Советы Рәисе.
Мөхәммәтшин искә төшергәнчә, Бөек Ватан сугышы башлангач та 700 мең татарстанлы фронтка киткән, һәр икенчесе сугыш кырларыннан кайтмаган — «үз ватанын саклап һәлак булды».
«Татарстанның барлык шәһәрләрендә һәм районнарында, Россиядәге кебек үк, Җиңү көне билгеләп үтелә. Һәм бу көнне без Бөек Ватан сугышы фронтларында һәм тылда Җиңү яулаган кешеләр истәлегенә баш иябез. Без һәрвакыт ата-бабаларыбызның батырлыкларын һәм казанышларын, тылда хатын-кызлар һәм үсеп килүче яшь буын өлешенә туры килгән гаять авыр хезмәтне истә тотачакбыз. Һәм тагын бер тапкыр үз ватаныбызга мәхәббәтнең дәүләт үсешенә ярдәм итүенә инанабыз», — диде ул.
Парламент җитәкчесе фикеренчә, яшьләр өчен бу вакыйга. Мондый акцияләр вакытында яшьләр таныша, аралаша. Без бу канкойгыч сугышта җиңүчеләрне хөрмәт белән искә алабыз. Без бәхетле тыныч вакытта яшибез һәм дөньяда тынычлыктан кыйммәтле берни дә юклыгын аңлыйбыз», — диде ул.
Җиңү көне алдыннан митингта катнашучылар бер минутлык тынлык белән фашизмга каршы көрәштә һәлак булганнарны искә алды. Аннары Татарстан халыкларының Яшьләр ассамблеясе вәкилләре дөньяның төрле телләрендә сугыш турында шигырьләр укыды. Чара азагында алар бергә «Катюша» җырын башкарды.
Акция 6 — 8 майда «Татарстанның мәдәни мозаикасы» VII яшьләр халыкара фестивале кысаларында узды. Анда Татарстан халыкларының 120 вәкиле, шулай ук чит ил студентлары катнашты.
