Лилия Галимова Президентның сайлауларга бәйле фикере турында: “Бәя бирүче без түгел”

Хөкүмәт йортында уза торган журналистлар очрашуы коронавирус, сайлауга бәйле мәсьәләләр тирәсендә әйләнде. Президентның бу атна азагына бәйле эш-сәфәрләреннән кала, көн кадагында торган сорауларга да ачыклык кертергә тырыштылар.

Күршеләр тәҗрибәсен кулланмаячаклар. Билгеле булганча, балалар арасында вируслы авырулар көчәю сәбәпле, Башкортстан мәктәпләре дистанцион рәвештә укуга күчә. Татарстанның бу җәһәттән үз юлы. Татарстан Президенты матбугат хезмәте җитәкчесе Лилия Галимова белдергәнчә, республика мәктәпләре «дистант»ка күчәргә җыенмый.

– Бездә система көйләнгән. Балалар арасында чир йоктыру билгеләре күренә икән, аларны өйләренә кайтарып җибәрәләр. Берәү дә барлык уку-укыту процессын «дистант»ка күчерергә җыенмый. Әгәр дә баланың өйдә булуы кирәк икән, мондый очраклар аерым карала. Бу – катлаулырак формат, әмма без белем бирү процессын бозарга тиеш түгел. Президент куйган төп бурыч – мәктәпнең коронавирустан куркынычсыз урын булуын тәэмин итү, – диде ул.

Сүз уңаеннан, Татарстанда коронавируска бәйле рәвештә яңа чикләүләр кертү нияте юк. Лилия Галимова белдергәнчә, Рөстәм Миңнеханов һәр иртә вазгыятькә бәйле хисап белән таныша. Иртәнге җыелышта оператив штаб, Роспотребнадзор, Сәламәтлек саклау министрлыгы вәкилләре катнаша. Бу очрашуда республикадагы санитар-эпидемиологик хәл турында фикер алышалар. «Әлегә яңа чикләүләр турында сүз алып барылмый. Татарстанда вакцина җитәрлек күләмдә һәм хакимият теләге булганнарга вакцинация оештырырга әзер», – диде ул.

Сайлау шаукымы тынды кебек. Лилия Галимовадан, Президентның узган тавыш бирүгә бәйле фикере нинди, дип сорашты журналистлар.

– Сайлауга бәя бирүчеләр без түгел. Моны Үзәк сайлау комиссиясе эшли, алар – оештыручы. Тик Президент үз фикерен бар халыкка җиткерде бит инде. Ул Татарстанның сайлауда катнашкан һәр кешесенә рәхмәтле. Республика Үзәк сайлау комиссиясе сайлау оешкан төстә узсын өчен тырышты, – диде ул.