Татарстан Республикасы мөфтияте яңа челлендж башлап җибәрде. Ул сөекле пәйгамбәребез Мөхәммәднең (с.г.в.) туган көне уңаеннан үткәрелә.
ТР Диния нәзарәте матбугат хезмәте билгеләп үтүенчә, Рабигыль-әүвәл аенда Аллаһ илчесе (с.г.в.) дөньяга килгән. Аның туган көне Мәүлид ән-Нәби дип атала һәм ул ай дәвамында билгеләп үтелә. Әлеге уңайдан Татарстан мөфтияте флешмобка кушылырга чакыра. Моның өчен социаль челтәрләрдә Пәйгамбәребезгә (с.г.в.) атап салават әйтелгән язманы куярга һәм аны #скажисалаватпророку хештегы белән билгеләргә кирәк.
Челленджны Татарстан мөфтие Камил хәзрәт Сәмигуллин башлап җибәрде. Хәзрәт барлык теләүчеләрне акциядә катнашырга һәм челленджны башкаларга тапшырырга чакырды.
