Россиядә югары уку йортларына кабул итү кампаниясе быел 20 июньдә башлана.
«Документлар 20 июньнән 25 июльгә кадәр кабул ителә», – дип яза ТАСС Мәгариф һәм фән министрлыгының кайнар элемтәсе хәбәренә сылтама белән.
Бу Бердәм дәүләт имтиханы нәтиҗәләре буенча укырга керергә җыенучы абитуриентларга кагылачак. Укырга керү турындагы мәгълүмат 9 августта билгеле булачак.
Абитуриентлар документларны югары уку йортларына дүрт ысул белән тапшыра ала — уку йортына килеп, почта аша, мәгариф учреждениесенең мәгълүмати системалары ярдәмендә яки «Поступление в вуз онлайн» суперсервисы ярдәмендә.
