«Ватаным Татарстан» газетасы уйнаткан трактор хуҗасы билгеле

«ВТ»дан трактор откан Фаварис Галиев: «Башта ышанмый тордык, шаяралар дип уйладык»

Без укучыларыбызны һәрдаим сөендереп торырга тырышабыз. Менә бу юлы да 2022 елның беренче яртыеллыгына газетага язылучылар арасында мини-трактор уйнаттык. Акциянең иганәчесе – «Уралец» компаниясе белән әзерләнгән әлеге бүләк кемгә насыйп булды соң?

«Ватаным Татарстан»га язылучыга – мини-трактор» акциясе 2021 елның ноябреннән 2022 елның гыйнварына кадәр дәвам итте. Катнашу өчен бик гади шартлар билгеләдек – газетабызга беренче яртыеллыкка язылып, 2022 елның 16 гыйнварына кадәр моны раслаучы квитанцияне безгә юлларга кирәк иде. Нәтиҗәдә, әлеге акциядә 1500дән артык укучыбыз катнашырга теләк белдерде!

Җиңүчене исә редакция коллективы белән 20 гыйнварда ачыкладык. Алдан әйтелгәнчә, барысы да гадел узды, мини-тракторның булачак хуҗасын жирәбә юлы белән белдек. Әлеге мизгелләрне «Инстаграм»дагы сәхифәбез аша туры трансляциядә күрсәтеп бардык. Бәхетленең исеме кем, дисезме? Газетабыз уйнаткан мини-трактор Балтач районының Смәел авылында гомер итүче Фаварис Галиевка насыйп булды. Без аны чын күңелдән котлыйбыз!

Җиңүче ачыкланып, аңа бу хәбәрне җиткереп шалтыраткач, берничә минуттан Фаварис абый үзе кабат элемтәгә чыкты. Ышанмаганнар икән куанычлы хәбәргә: мошенниклар алдамыймы дип борчылганнар! Нишләмәк кирәк, заманасы шундый. Тугызынчы дистәсен ваклаучы укучыбыз газета белән 10 яшьлек чагыннан бирле таныш икән.

– Сез шалтыраткач, әбием баскан җиреннән биеп китә язды. Әле дә ышанып бетеп булмый – бүләге бигрәк саллы бит! Кичә генә шул турыда уйлап куйган идем. Мин бит «Ватаным Татарстан»ны 10 яшемнән бирле укыйм. Безнең мәрхүм әтиебез дә 95 яшенә кадәр укыды аны, бер калдырмады. Гаиләбезнең канына сеңгән басма. Уку гына түгел, бик еш язышып торабыз әле без. Газета битләрендә күп тапкырлар шигырьләрем басылды. Аларны күргән саен сөенәм, – диде ул. – Инде бер генә бүләк уйнатмадыгыз бит, моңа кадәр дә сез уздырган бәйгеләрдә катнаша килдек. Алла рәхмәте, монысында бәхет елмайды бит, әй!

Фаварис абыйның тормыш иптәше Гөлсем апага быел 75 яшь тула. 36 ел буе укытучы булып эшләгән. Ул чакларда газета кулдан гел төшми иде, ди:

– «Ватаным Татарстан»ны килен булып төшкәнче, әти-әниемнән күреп тә укый идем. Мөгаллим булып эшли башлагач, ул безнең кулланма газетага әверелде. Элек-электән җәмгыятьнең бөтен якларын яктырта белдегез. Рәхмәт сезгә! Газетагыз көннән-көн матурлана, кулдан төшерәсе дә килми, – ди ул. – Әле беркөнне газетаны почта әрҗәсеннән алып керергә оныткан идек. Төн җиткәч кенә искә төште. Соң булса да, чыгып кердек, әллә төнге уникенче яртыларга тикле укыдык. Шуны укып чыкмыйча йоклап та булмый бит!

Фаварис абый белән Гөлсем апа ике ул һәм ике кыз үстерә. Малайлары күршеләрендә генә яши икән. «Ул трактор малай белән икебезгә булыр инде. Үзебезнең дә бакча бар бит. Кечкенә булса да, эше җитәрлек. Алла боерган булса, трактор булган эшне җиңеләйтер иде», – ди Фаварис абый.


«Ватаным Татарстан» газетасына языл һәм бүләк от» акциясе җиңүчесе билгеле!

Исегезгә төшерәбез, 2022 елның беренче яртыеллыгына газетага язылучылар арасында мини-трактор уйнатачагыбызны хәбәр иткән идек. Акциянең иганәчесе – «Уралец» компаниясе белән әзерләнгән әлеге бүләк күңелегезгә хуш килер дип ышанабыз.

Бүләкне алу  өчен түбәндәге шартларны үтәргә кирәк иде:

  1. «Ватаным Татарстан» газетасына 6 айга язылырга.
  2. Язылу квитанциясен безгә җибәрергә: «Ватсап» (89179270040) яки почта аша (420097, Казан шәһәре, Академия урамы, 2 нче йорт, «ВТ» газетасы редакциясе), яки электрон адреска: info@vatantat.ru

 

Фото: Илдар Мөхәммәтҗанов


Фикер өстәү