Чакырылмаган кунак: Татарстанда коронавирус йоктыручылар саны 1,5 тапкыр арткан

Бер тәүлек эчендә Татарстанда коронавирус йоктыручылар саны 1,5 тапкыр (!) арткан.
Курыккан куш килә башлады. Бер тәүлек эчендә Татарстанда коронавирус йоктыручылар саны 1,5 тапкыр (!) арткан. Ил күләмендә исә бер тәүлек эчендә 65 меңнән артык кешегә шундый диагноз куелган.

Белгечләрнең коронавирусның «омикрон» штаммы алдагыларыннан күпкә йогышлырак, вирусның чираттагы дулкыны аеруча авыр узачак дигән фаразлары чынга аша башлады булса кирәк.
Татарстан Сәламәтлек саклау министрлыгы мәгълүматларына караганда, соңгы бер тәүлек эчендә республикада 213 кеше коронавирус йоктырган. Шуларның 36сы хастаханәдә ятса, калганнары өйдә дәвалана. Авыру очракларының күбесе Казанда теркәлгән. Шул рәвешле пандемия башланганнан бирле ковид белән авыручылар саны 45528гә җиткән. Ил күләмендә бу сан 11 миллионнан артып китте.

Белгечләр коронавирусның яңа «омикрон» штаммы алдагыларыннан күпкә мәкрлерәк дип кисәтә. Күп очракта ул кешедә бернинди билгеләрсез генә дә узарга мөмкин, ди алар. Әмма соңгы арада галимнәр фәкать яңа штаммга гына хас булган үзгә билгеләрне  дә ачыклый башлаган. Билгеле булганча, коронавирус вакытында кеше, иң беренче чиратта, ис һәм тәм сизми башлый. Һәрхәлдә ковидның алдагы штаммнары вакытында чир еш кына әнә шулай башлана иде. «Омикрон» йоктырган кешедә исә бу билгеләр, гомумән, күзәтелмәскә мөмкин икән. ДНКОМ молекуляр-генетик тикшеренүләр фәнни үзәге башлыгы Андрей Исаев бу көннәрдә «омикрон» штаммы организмга күзләр аша да үтеп керә ала дигән белдерү белән чыкты. «Коронавирусның әлеге штаммын йоктырган кешедә еш кына конъюктивит башлана. Шуңа күрә ул организмга күзләр аша да үтеп керә ала», – ди белгеч.

Балаларда исә ул бронхит, эч китү кебек билгеләр белән узарга мөмкин дип кисәтәләр. Татарстанга балаларга коронавируска каршы ясала торган «Спутник М» вакцинасының беренче партиясе кайтты. Ул 2880 дозадан тора. Татарстанның баш эпидемиологы Дмитрий Лопушов сүзләренә караганда, бу көннәрдә аны хастаханәләргә таратачаклар. Ел дәвамында исә Татарстанга 200 меңнән артык доза «Спутник М» вацинасы кайтыр дип көтелә. Яңа вакцинаны 12–17 яшьлек үcмерләргә ясарга җыеналар. Хәзерге вакытта республиканың белем бирү оешмаларында укучы балаларның әти-әниләреннән коронавируска каршы прививка кадатуга рөхсәт язуы жыялар. Вакцина ясатырга риза булучылар прививканы бу атнада ук кадата алачак. Сүз уңаеннан, хәзерге вакытта республикада барлыгы 2357399 кеше коронавируска каршы привика ясаткан. Кабат вакцинация узучылар 173239 кеше.

Президент Рөстәм Миңнеханов атна ахырында Хөкүмәт йортында узган утырышта республика сәламәтлек саклау тармагының коронавирус белән вазгыять катлаулануга әзер булуын искәртте. «Коронавирус белән авыручылар саны кисәк артты. Ләкин стационарда ятучылар саны алай ук күп түгел. Шулай да, вазгыять катлаулана калса, ятак урыннар саны өч тапкыр арттырылачак», – дип белдерде Рөстәм Миңнеханов. Медицина җиһазлары белән даруларның да контрольдә булуын искәртте ул. Президент сакланырга һәм сак булырга кушты.

Авыручылар саны артса да, «омикрон» штаммы аркасында илдә локдаун игълан итәргә җыенмыйлар. Россия Президенты Владимир Путинның матбугат сәркатибе Дмитрий Песков журналистларга шулай дип белдерде. «Авыручылар саны арта, әмма хастаханәдә ятучылар саны артмый. Локдаун кертелү турында сөйләшүләр алып барылмый», – дигән ул.

 

Фото: Илдар Мөхәммәтҗанов


Фикер өстәү