Редакциягә ярдәм сорап мөрәҗәгать итүчеләр шактый. Казанда яшәүче Регина безне социаль челтәрләр аша эзләп тапты. Туганына ярдәм итүебезне сорый. 10 айлык сабыйга ярдәм кирәк.
…Язмыш Валентина белән Рөстәмне моңарчы да сыный. Алар, күп хәсрәтләр кичереп, ятимлектә үсәләр. Бер-берләрен табып, тормышның кадерен, яшәүнең ямен аңлап яши башлагач, гаиләләренә хәсрәт килә. Кечкенә уллары Искәндәргә 5 ай тулгач, аңарда куркыныч һәм сирәк очрый торган генетик авыру барлыгы ачыклана.
– Барыбыз өчен дә зур хәсрәт бу, – ди Рөстәмнең туганнан-туган сеңлесе Регина. – Абыебыз кечкенәдән әтисе белән генә үскән. Әнисен ана хокукларыннан мәхрүм иткәннәр. Шуңа да минем әнием Рөстәм абыйны үз баласыдай күрә. Бергә яшибез. Киленебез Валентина да – күпне күргән кеше. Әти-әнисенең кайдалыгын да белми хәтта. Ул Лаеш балалар йортында тәрбияләнгән.
Менә шушы ике ятим бала гаилә корып җибәргәч, йөзләрендә елмаю барлыкка килә. Беренче кызлары Динарага карап сөенүләр! Тигез, матур тормышта яшәү алар өчен сөенеп туймаслык хәл була. Тик кечкенә Искәндәрнең биш ае тулгач, кинәт кенә гәүдәсе йомшарып китә. Республика балалар клиник хастаханәсендә тикшерелгәч, диагнозны раслау өчен анализны Мәскәүгә җибәрәләр. Ике айдан хәбәр килә: Искәндәрдә – арка мускуллары атрофиясе дигән авыру.
Хәзерге вакытта Искәндәр әнисе белән Республика балалар клиник хастаханәсендә дәвалана.
– Табиблар ничек кенә тикшермиләр. Бик күп документлар җыябыз. Табиблар да балама ярдәм итәргә тырыша, – ди Валентина. – Безнеке кебек диагнозлы балаларга Мәскәү фонды ярдәм оештыра. Без дә ул фондка мөрәҗәгать иттек. Тик күңел курка. Чиратыбызны көтеп өлгермәбез кебек. Баланың язмышын бер укол хәл итәчәк. Әмма аның бәясе без күтәрә торган түгел. Аның өчен 121 миллион сум акча кирәк. Искәндәргә кадәр шул уколны көтүче дүрт бала бар. Сабыем шул уколны көтеп җиткерә алсын иде дип телибез.
Искәндәрнең хәле начараеп китмәсен өчен, ЛФК күнегүләре ясатырга кирәк икән. Аның өчен махсус инструктор чакыртырга, аңа акча түләргә кирәк. Шулай ук өйгә кайткач, сабыйның бүлмәсенә һава чистарта торган дымландыргыч, ингалятор, утырып торыр өчен махсус урындык, пульсын контрольдә тотарга, кандагы кислород күрсәткечен белергә махсус аппаратлар кирәк. Өйдәге инфекцияләрне бетереп торыр өчен лампа да куярга кушалар. Әмма бу гаиләнең әлеге кирәк-яракларны алыр өчен мөмкинлекләре юк.
– Улым авыру булгач, мин аны бер минутка да ташлап китә алмыйм. Гаиләдә бары тик ирем генә эшли. Әле бит олы балам да бар. Шуңа да мәрхәмәтле кешеләрдән ярдәм сорыйм. Гаиләбезгә килгән хәсрәткә битараф булмасагыз иде, – ди Валентина.
Кечкенә Искәндәргә ярдәм итәргә теләүчеләр өчен исәп-хисап реквизитлары:
әнисе Валентина Александр кызы Королева исемендәге Саклык банкы картасы номеры: 5228 6005 4117 1353. ВТБ банкы картасы номеры:
6769 0700 4614 0258.
Гөлгенә Шиһапова
