Тагын «Авангард». Узган ел «Ак барс» плэй-оффтагы чыгышын Омск хоккейчыларына җиңелү белән тәмамлаган иде. Гагарин Кубогы өчен быелгы көрәшне якташларыбыз янә шул ук командага каршы уеннар белән башлый. Иртәгә узасы тәүге очрашу алдыннан Казан хоккейчыларына Президент Рөстәм Миңнеханов та уңыш теләде. «Ак барс»тан ни өмет иткәннәре сер түгел. Килеп чыкса, хәтта Данис Зарипов та үз сүзләреннән баш тартырга мөмкин.
Хәтерләсәгез, «Ак барс» белән «Авангард» узган ел Көнчыгыш конференциясе финалында очрашты. Бик кискен каршылык булды ул. Омск уенчысы Алексей Емелинның сәер рәвештә авырып китүе, аннары аның организмында наркотик табылуы турындагы имеш-мимешләр, Казан командасында лидер дип саналган чит ил хоккейчыларының кәшәкә тота алмый башлавы – кыскасы, көрәш боздагы уеннар белән генә чикләнмәде. Серия 7 очрашуга сузылды, көндәшләр үз тамашачысы алдында җиңә алмый азапландылар. Хәтта хәлиткеч җиденче матчта да җиңүче бары овертайм, ягъни өстәмә вакытта гына ачыкланды. Ахыр чиктә Омск командасы өстен чыкты һәм соңрак төп финалда ЦСКАны да җиңеп, үз тарихында тәүге тапкыр Гагарин Кубогы иясе булып танылды.
Узган ел көндәшләр финалга чыгу өчен көрәшсә, быел аларга плэй-оффның беренче өлешендә үк очрашу насыйп булды. Дөресрәге, насыйп иттеләр. Ник дигәндә, гадәттә, плэй-оффта кемнең кем белән уйныйсы даими чемпионат йомгаклары буенча ачыклана. Әмма быел күп гадәтләрдән баш тартырга туры килде. Башта әлеге ярышны вакытыннан алда туктаттылар. «Ак барс» турнир таблицасында өченче урында туктап калды, димәк, алтынчы баскычтагы «Сибирь» белән уйнарга тиеш иде. Әмма КХЛ түрәләре башка карар чыгарды: командалар уйнаган очрашулар саны төрлечә, шуңа күрә җиңү күрсәткечләрен процентларга күчерергә кирәк. «Ак барс»ныкы 68,75% булды. Дүртенче урындагы «Салават Юлаев»ның очколары 4кә азрак, әмма уеннары да азрак икәнен исәпкә алгач, Уфа командасының күрсәткече 68,88% булды. Әнә шул кечкенә генә аерма аркасында «Ак барс»ка гамәлдәге чемпион «Авангард»ка каршы уйнарга туры килә. Көчле команда. Икенче яктан, Гагарин Кубогы турында хыялланасың икән, көчле көндәшләргә каршы барыбер уйнарга туры киләчәк.
«Ак барс»та былтыргы җиңелүдән сабак алганнармы? «Узган елгы серияне оныттык инде. Үч алу турында гына уйлап утыра алмыйбыз бит. Һәр команданың җиңәсе килә. Былтыргы уеннардан соң нәтиҗә чыгардык. Кайда нәрсә җитешмәгәнен ачыкларга тырыштык, – ди Казан командасының баш тренеры Дмитрий Квартальнов. – Быел да уеннар кызык булыр дип уйлыйм. Без – «Авангард»ны, алар безне белә. Әмма плэй-офф озакка сузылган тәнәфестән соң башлана. Әлбәттә, әзерлек уеннары уздырдык, әмма аларда ул кадәр үк кискенлек юк. Плэй-оффтта уңыш булсын өчен бәхет тә кирәк, капкачылардан да күп нәрсә тора. Быел үз бозыбызда җиңәргә тырышачакбыз».
Плэй-офф җитте исә, Дмитрий Квартальновның көчле командаларда ничә ел эшләп тә, Гагарин Кубогын ота алмаганын искә төшерәләр. Быелгы сезон ахырында аның «Ак барс» белән килешүе тәмамлана. Димәк, алдагы язмышы плэй-оффка бәйле. Квартальновтан аермалы буларак, Казан командасы капитаны Данис Зариповның Гагарин Кубогын 5 мәртәбә тотып караганы бар. КХЛда башка мондый уенчы юк! Әмма сезон алдыннан Данис соңгы елын уйнаячагын әйткән иде. Дөрес, ике көн элек журналистлар белән очрашкач, фикере үзгәрергә мөмкин икәне сизелде.
– Биш ел элеккеге кебек уйный алмаячагымны аңлыйм. Әмма командага файда китерү, егетләрне туплап тору өчен барысын да эшләячәкмен. «Ак барс» инде өченче ел рәттән Гагарин Кубогын ота алмый. Мондый команда җиңүсез бу кадәр озак торырга тиеш түгел, – ди ул. – Карьераны тәмамлауга килгәндә, башымны чит әйберләр белән катырасым килми. Әлегә сүзем үз көчендә, үзгәрешләр юк. Гагарин Кубогын отабыз икән, карарбыз, Алла боерса.
Плэй-оффтагы тәүге уен алдыннан «Ак барс» командасы белән Татарстан Президенты да очрашты. «Бу уеннар җиңел булмаячак, чөнки барысы да җиңәргә тели. Әмма безнең команданың потенциалы зур һәм иң югары баскычка күтәрелү мөмкинлеге бар. Узган ел җиңүгә аз гына җитмәде. Әмма барыбер яхшы уйнадыгыз. «Ак барс» – республика командасы. Сезнең өчен һәрвакыт җан атачакбыз», – диде ул. Капитан Данис Зарипов Рөстәм Миңнехановка клубның яңа логотибы төшерелгән джерси бүләк итте. Элеккеге логотипны 1995 елда ук ясаганнар иде, инде искергән, диләр. Яңасы яңа җиңү китерсен!
Илнар ХӨСНУЛЛИН
