Быел “Тантана” театр премиясе Казанда уздырылмаячак

Ел саен 27 март – Театр көнендә әлеге өлкәдә хезмәт куючылар “Тантана”га җыела. Гадәттә, чара Казанда, Камал театрында була иде. Быел исә премиянең уздырылу урыны үзгәргән. Бу хакта “Татар-Информ”да узган матбугат очрашуында сөйләделәр.

Быел “Тантана” театр премиясен тапшыру тантанасы Казанда түгел, Чаллыда узачак. Бу хакта Татарстанның мәдәният министры урынбасары Дамир Нотфуллин хәбәр итте.

– Төп яңалык – әлеге премиядә җиңү яулаучыларның исемнәре Аяз Гыйләҗев исемендәге Чаллы драма театрында игълан ителәчәк. Миңа калса, бу – бик дөрес карар, чөнки “Тантана” кебек мәртәбәле чараларны республика үзәгендә генә түгел, башка шәһәрләрендә дә уздырырга кирәк, – диде ул. – Бездә башка театр премияләре дә бар, ләкин аларның һәркайсы да “Тантана” кебек ел саен уздырылмый. Ел да гаризаларның күп булуы һәм премиянең даими узуы аның әһәмияте турында сөйли.


Фикер өстәү