Быел республикакүләм ифтар мәҗлесе 30 апрельдә «Казань Экспо» халыкара күргәзмәләр үзәгендә узачак. Чара турында матбугат очрашуында сөйләделәр. X республика ифтар ашы Идел буе Болгар дәүләтендә ислам дине кабул ителүенең 1100 еллыгына багышланачак.
«Ифтар ашы Татарстанның бөтен почмакларыннан 10 мең кешене җыяр дип ниятлибез. Алар арасында төрле дәрәҗәдәге җитәкчеләр, чит төбәкләрдән кунаклар, мохтаҗлар һәм аз керемлеләр, рәсми затлар да бар», – дип сөйләде Татарстан мөфтиенең беренче урынбасары Илфар хәзрәт Хәсәнов. Ул шулай ук рамазан аеның ахыргы ун көненә аеруча игътибарлы булырга, гыйбадәтләрне арттырырга өндәде.
Республика ифтарында җәмәгать белән ахшам намазы да укылачак. «Ифтар – мөселманнарны берләштерүче мәҗлес. Һәм бу мәҗлескә без ашау-эчү өчен түгел, ә рухи ризык алу өчен җыелабыз», – диде Илфар хәзрәт матбугат очрашуында.
Ашау-эчү димәктән, быелгы ифтар кунакларына 600әр сумлык комплектлар әзерләячәкләр. Оештыру эшләрен башкару өчен, 16 яшьтән өлкән 500ләп волонтер чакырырга ниятлиләр. Ифтар үткәрүдә ярдәм итәргә теләүчеләр Татарстан мөселманнары Диния нәзарәтенең рәсми сайтында теркәлә ала.
«Туган авылым» ресторан комплексы җитәкчесе, мәҗлесне оештыручыларның берсе Радик Габдрахманов сүзләренчә, ифтар бик «тәмле» булачак. «Бәяләрнең артуы йогынты ясамый калмады, билгеле. Ләкин бу ифтарның масштабын һәм «тәмен» үзгәртмәс дип уйлыйбыз. Менюда пылау, төрле камыр ризыклары, чәкчәк, яшелчә һәм җиләк-җимешләр, кипкән җимешләр, төрле эчемлекләр булачак», – дип сөйләде ул. Ризыклар әзерләү өчен 1 тонна дөге, 2 тонна сыер ите, 1,5 тонна яшелчә, 1 тонна җиләк-җимеш, 1 тонна кипкән җимешләр, 600 кг чәкчәк һәм башкалар әйберләр сатып алганнар. Чагыштыру өчен, 2017 елда узган республика ифтар мәҗлесе өчен 3 тонна пылау пешергән булганнар.
Быелгы ифтарның тагын бер яңалыгы – чакыру билетларының электрон рәвештә генә булуы. «Быел республика ифтарына чакыру билетлары кулга бирелмәячәк. Аларны без электрон рәвештә юллаячакбыз», – дип аңлатты Илфар хәзрәт. Билетлар мөхтәсибәтләр, мәчетләр аша биреләчәк. Ифтарда катнашу теләге булган кешеләр Диния нәзарәтенә гаризалар да юллый ала, аларны мөфтият җитәкчелеге караячак.
Мәҗлес нәшидләр һәм мөнәҗәтләр белән үрелеп барачак. Шулай ук ифтарда хәләл-маркет эшләячәк, хатын-кызлар өчен мөселман киемнәре тәкъдим ителәчәк, танылган дин әһелләре рамазан аеның фазыйләтләре турында вәгазьләр сөйләячәк. Моннан тыш, чарада дини гыйлем алу мөмкинлекләре белән танышып булачак.
30 апрельдә X республика ифтары кунаклары өчен Казан – Аэропорт – Казан маршруты буенча өстәмә шәһәр яны поездлары йөреячәк. Бу турыда Казан мэриясе хәбәр итте. Бу көнне мәҗлескә 7601, 7602, 7603, 7604, 7606 нчы номерлы поездлар белән барып җитәргә мөмкин булачак.
Телеграмда безнең каналга кушылыгыз: https://t.me/vatantat