Биология укытучысы Нурисә Ибәтуллина: «Яшел, зәңгәр йомыркаларга чират зур»

Арча районының Ашытбаш мәктәбе укытучысы Нурисә Ибәтуллинаның тавыклары яшел, зәңгәр, ал, соры төстәге йомырка сала. Өйдә генә түгел, инкубаторын мәктәпкә алып барып, укучыларын фәнгә дә тарта ул. Авыл халкы йомыркасын да, чебиләрен дә сорап тора икән.

Белгечлеге буенча физика укытучы булса да, мәктәптә  биология, технология, математика фәннәреннән укыта. Кош-кортларны яраткангамы, күңеленә аеруча биология якын. Укучысы Әсгать Гәрәев  технологиядән узган бөтенроссия бәйгесенең республика этабында призер булган. Үзе инкубатор ясап, шуның проектын яклаган.

– Чебиләрнең икенче партиясен чыгарам. Руан токымлы үрдәкләрем, төрле төстәге йомырка сала торган чебиләрем бар. Су буенда холмогор токымлы 62 баш казым йөри. Алар да  үзебездә чыккан, – ди Нурисә ханым.

Үзенчәлекле йомырка сала торган чебешләрне ул Яшел Үзәндәге Зур Елга авылыннан алып кайткан. Ул вакытта берсенең бәясе 250 сум торган. «Гаилә бюджетына суга дип, бәясен иремә дә әйтмәдем. Үрчетәсе килә бит. Шуннан соң инкубаторга йомыркаларын куеп чыгара башладым. Чебиләрне авыл халкы сатып ала торды. Шулай итеп, әлеге тавыклар тирә-якта бик тиз таралып китте. Бигрәк тә балаларына йомырка ашата алмаган әти-әниләр кызыгып ала. Матур төсле булгач, сабыйлары, ашамыйм дип киреләнми. Гел алып торучыларым бар, кайчак чират та була әле. Йомыркаларын күбрәк Арча, Казаннан килеп алып китәләр», – ди ул.

Сату өчен иң кулай вакыт – июнь. Соңга калгач, чебешләрне бик алмыйлар икән. Аларга суык ярамый. Бер елны августта чыгарган чебиләрен кыш буе ут яктысында тәрбияләргә туры килгән. Бик азаплангач, чебиләрне хәзер заказга гына чыгара башлаган. Бу төр тавыклар өчәр кило ит бирә, йомырканы да әйбәт сала. Нурисә Ибәтуллина быел  интернет аша Ярославль өлкәсеннән үрдәк йомыркалары сатып алган. Руан токымлы бу үрдәкләр зур һәм итләч була икән. Тәрбияләү алымнары аерылмый. Гадәти тавык-чебешләрнеке кебек үк, ди.

Сәрия Мифтахова