Илһам Шакиров исемендәге республика премиясенә гаризалар кабул итү дәвам итә. Конкурсның быелгы үзенчәлекләре, таләпләре нинди? Матбугат очрашуында әнә шулар турында сөйләделәр.
Премия һәр ике ел саен республиканың татар җыр сәнгатенә зур өлеш керткән, җыр сәнгатендә югары осталыкка ирешкән башкаручыларга тапшырыла. Узган ел ул тәүге тапкыр бирелде.
Бәйгедә узган елдагыча өч номинация (ир-атлар, хатын-кызлар вокалы һәм халык җыры номинациясе), приз фонды – 600 мең сум. Быелгы конкурс турында Татарстан мәдәният министры урынбасары Дамир Нотфуллин сөйләде.
– Премия бөек татар җырчысы Илһам Шакиров истәлегенә багышлап татар мәдәниятен саклау һәм башкару осталыгы дәрәҗәсен үстерү максатыннан оештырылды. Ул ике елга бер тапкыр Илһам Шакировның туган көнендә – 15 февральдә тапшырыла. Беренче елда утызга якын гариза килде. Быелгы конкурс август аенда старт алды. Гаризалар 15 ноябрьгә кадәр дәвам итәчәк, – диде ул.
Бәйгегә чит төбәкләрдән, чит илләрдән дә җырчылар катнашыр дип көтелә. Бөтендөнья татар конгрессы башкарма комитеты рәисе Данис Шакиров әйтүенчә, республикадан читтә яшәүче милләттәшләребездән Бөтендөнья конгрессының татар оешмалары аша гаризалар кабул ителә.
– Татар дөньясы ул Татарстан белән генә чикләнми. Бу премия республикакүләм дип аталса да, аның катнашучылары саны да, географиясе дә бик колачлы. Илебезнең 70кә якын төбәгеннән катнашалар. Шулай ук, Үзбәкстан, Казахстан, Таҗикстан, Төрекмәнстан кебек илләрдән икенче ел гаризалар килә, – диде Бөтендөнья татар конгрессы башкарма комитеты рәисе.
Габдулла Тукай исемендәге Татар дәүләт филармониясе директоры Кадим Нуруллин «Татар моңы» фестиваленә Илһам Шакиров исеме бирелүен искәртте:
– Бу безнең дәрәҗәбезне тагын да күтәрә. Ник дигәндә, бүген популяр булган бик күп җырчылар «Татар моңы» аша танылган. Ә инде фестивальне Илһам Шакиров исеме белән бәйләү җаваплылыкны бермә-бер арттыра, – диде ул.
Илһам Шакиров премиясе Тукай премиясе дәрәҗәсендә булырга тиеш. Татарстанның халык артисты Салават Фәтхетдинов матбугат очрашуында әнә шундый фикер әйтте.
– Тукайның – үз, Илһам абыйның үз чоры. Бу премияне алу өчен көрәш булырга тиеш. Безгә җыелышып аның күләме турында да сөйләшергә кирәк әле. Бигрәк вакланабыз, зур кешенең исеме белән мондый бәяне йөртү оят, – диде халык җырчысы.
Салават Фәтхетдинов Илһам Шакиров исемен мәңгеләштерүдә журналистлардан да активлык сорады.
– Илһам абыйның исеме белән атап куйдык та, шуның белән тукталдык. Исемне конкурслар оештырып кына мәңгеләштереп булмый, сез дә эшләргә тиеш. Көн саен булмаса да, Илһам абыйны искә төшереп торырга, язарга кирәк. Бәйгегә чит илләрдән дә киләләр дибез, алар безгә күбрәк география өчен кирәк. Читләргә өметләнеп, әллә кайдан көткәнче, Татарстанда яшәгән, татарча сөйләшкән җырчыларны табарга, аларны күтәрергә кирәк. Быел кемнәр килер, нәрсә белән шаккатырыр, татар моңы, җырының кая таба барганын шуннан күрәчәкбез инде, – диде Салават Фәтхетдинов.
Ләйсән Сафина
АнонимИ раббым 🤲 аллахы тэгэлэм ботсен иде инде бу сугышлар. Доньялар тоныч булсын иляхи 🤲 я раббым 🤲 😢Фирдүс Тямаев: “Повестка килсә, барыбыз да барабыз. Икетуган энем баштан ук шунда…”
Загрузка ...
