Илдә өлешчә мобилизация дәвам итә. Район һәм шәһәрләрдә егетләрне хәрби җыен узасы урыннарга озата башладылар. Аларны автобуска утыртып, артларыннан кулъяулык болгау белән генә эш бетми. Егетләрнең күңеле тыныч булсын өчен гаиләләренә ярдәм күрсәтәчәкләр. Барысы да гадел һәм дөрес булсын өчен дә чаралар күрергә туры киләчәк.
Чаллыда шимбә көнне 74 егетне озаттылар. Кала мэры Наил Мәһдиев әйтүенчә, өлешчә мобилизация шәһәрдә яшәүче 1200 кешегә кагылачак. Аларның 90ы – офицерлар. «Безнең Чаллыда үзгә характер. Ул эштә генә түгел, яу кырында да күренә. Барыбыз да хәрби ант бирдек. Безнең икенче Ватаныбыз да, икенче әниебез дә, запас аэропортыбыз да юк. Ватаныбыз биредә: яшәгән урыныбыз да, яшәгән җиребез дә шунда», – диде ул егетләрне озатканда.
Наил Мәһдиев әйтүенчә, киткән егетләрнең гаиләләренә өстәмә ярдәм күрсәтеләчәк. Аларның мәктәптә укучы балаларын бушлай ашатачаклар, бакчага йөргән сабыйлар өчен дә түлисе булмаячак. Мондый ярдәм 1 октябрьдән күрсәтелә башлый. Автокаланың мәгълүмат сәясәте һәм җәмәгатьчелек белән элемтәләр идарәсе хәбәр итүенчә, мобилизациягә эләккән һәр кешегә шәһәр бюджетыннан 20шәр мең сум акча бүлеп биргәннәр. «Армиягә ярдәм күрсәтүне дә дәвам итәчәкбез. Ходайга өметләнәбез, барысы да яхшы булыр дип ышанабыз», – диде Наил Мәһдиев.
Түбән Камадан хәрби җыенга 38 кешене озаттылар. «Алар – бүгенге заман геройлары. Бабаларыбыз кебек батырлык һәм кыюлык күрсәтәләр», – диде якташлары турында район башлыгы Рамил Муллин. Бу атнада Түбән Камадан тагын бер төркем егет юлга чыгачак.
Татарстанның Транспорт һәм юл хуҗалыгы министрлыгы өлешчә мобилизация кысасында районнардан 25 йөк машинасы бүлеп биргән.
Дөрес, мәшәкатьләр җитәрлек. Хәрби хезмәткә теләсә кемне алалар, яшенә дә, тәҗрибәсенә дә карап тормыйлар. Халык арасында да, социаль челтәрләрдә дә мондый хәбәрләр аз түгел. Моңа Федерация Советы Рәисе Валентина Матвиенко да игътибар иткән. Ул төбәк җитәкчеләренә мөрәҗәгать итте һәм аларны өлешчә мобилизация эшендә җаваплы кешеләр дип атады. Аның сүзләренә караганда, кайчак дәүләтнең мөһим карарын сыйфатлы итеп үтәү түгел, тизрәк хисап тотарга тырышалар кебек тәэсир кала. «Илдә ватанпәрвәрлек, берләшү, безнең махсус хәрби операция максатларын хуплау дәрәҗәсе гаять югары булганда, мондый очраклар булырга тиеш түгел. Өлешчә мобилизация тиешле шартларга туры китереп, бер хатасыз алып барылсын», – диде ул.
Охшаш мөрәҗәгать белән Дәүләт Думасы Рәисе Вячеслав Володин да чыкты. Хокук бозу очраклары булса, ул Дәүләт Думасына мөрәҗәгать итәргә киңәш бирде. «Беркемне дә мәшәкатьләре белән үзен генә калдырмабыз. Һәр очракны аерым тикшерергә кирәк. Хата киткән икән, төзәтергә кирәк», – диде ул.
Төбәкләрдә өлешчә мобилизация турындагы указны бозып эшләүчеләр барлыгын Мәскәү Кремлендә дә таныдылар. Россия Президентының матбугат сәркатибе Дмитрий Песков әйтүенчә, барлык мәгълүматны төбәкләргә һәм Оборона министрлыгына җибәреп торалар. «Җитешсезлекләрне тиз арада бетерерләр һәм барлык хаталар төзәтелер дип өметләнәбез», – диде ул.
Моннан тыш, Дмитрий Песков хәбәрләр укыганда да игътибарлы булырга киңәш итте. “Сак булырга кирәк. Дөреслеккә караганда, ялган мәгълүмат күбрәк”, – диде ул
АнонимАнын беткэне дэ юкТатарстанда грипп һәм коронавирус инфекциясенең кайчан көчәячәген аңлатканнар
Загрузка ...
