Юл бирегез, «Аурус» килә!

«Атлант», «Арго», «Аурус Комендант». Татарстанда җитештерелә башлаячак яңа машиналарның исемнәре бу. Заводка каршы санкцияләр кертелүгә карамастан, «КАМАЗ» да бер урында таптанып тормый. Россия Хөкүмәте Рәисе урынбасары – РФ сәнәгать һәм сәүдә министры Денис Мантуров һәм Татарстан Президенты Рөстәм Миңнеханов республиканың автомобиль сәнәгате өлкәсендәге яңалыклар белән таныштылар.

Чаллыга эш сәфәре кысасында Денис Мантуров һәм Рөстәм Миңнеханов «КАМАЗ»ның җитештерү цехларын карады. Мәскәү кунагына автозаводта җитештерелүче яңа модельләрне күрсәттеләр. Компания генераль директоры Сергей Когогин билгеләп үткәнчә, завод барлык йөкләмәләрне тулысынча үти һәм илнең транспорт иминлеген тәэмин итә. Санкцияләр булуга карамастан, К4 һәм К5 төрендәге йөк машиналары җитештерүне дәвам иттерәләр. Айлык күрсәткеч кимендә 100–150 автомобиль тәшкил итә.

Денис Мантуров һәм Рөстәм Миңнеханов «Алабуга» махсус икътисади зонасында да булды. Биредә алар «Соллерс» бренды белән җитештереләчәк автомобильләрне карады һәм эшне оештыру проектын башлап җибәрделәр. Американың «Форд» компаниясе ил базарыннан киткәннән соң, «Соллерс» яңа автомобильләр җитештерүне җайга салмакчы. Коммерцияле яңа җиңел йөк машиналарының исемнәре дә билгеле – «Атлант» һәм «Арго». «Соллерс»та елына 30 мең автомобиль җитештерергә ниятлиләр. Яңа проектка инвестицияләрнең гомуми күләме 5 миллиард сум тәшкил итәчәк, дип фаразлана.

Рөстәм Миңнеханов ассызыклаганча, республика «Соллерс» белән хезмәттәшлек итүне югары бәяли. «Компания күчеш чорында да хезмәт коллективын саклап калды. «Соллерс» коммерцияле җиңел машиналар җитештерүне җайга салды. Бу продукциягә ил базарында ихтыяҗ зур. Яңа проект республика өчен бик мөһим: бу – эш урыннары да, бюджетка керемнәр дә», – диде ул. «Соллерс» мәйданында алдагы дүрт айда җитештереләчәк машиналарның сатып алучылары билгеле инде.

Татарстанда тагын бер яңа машина җитештерелә башлады. Денис Мантуров һәм Рөстәм Миңнеханов «Аурус Комендант» автомобилен серияле җитештерүгә старт бирде.

«Аурус Комендант» – теләсә нинди юлдан йөри торган люкс класслы машина. Җитештерүгә кирәкле запас частьларның күп өлеше илдә, шул исәптән, Татарстанда җитештерелә. Моны Россия Хөкүмәте Рәисе урынбасары да ассызыклады. «Әлеге машина компонентларының 70 проценты үзебезнеке», – диде ул. Ел ярымга якын вакыт эчендә завод эш өчен кирәкле барлык юнәлешләрне җайга салуга ирешкән һәм менә күпләп җитештерүне башлау эшенә тотыналар. Денис Мантуров һәм Рөстәм Миңнеханов сәнәгать линиясе белән танышты, автоматлаштырылган идарә системасын карады. РФ сәнәгать һәм сәүдә министры әйтүенчә, алга таба «Аурус» брендын авиация һәм суднолар төзү тармакларында да үстерү күздә тотыла. Ул завод эшен югары бәяләде.

Кунаклар яңа автомобильдә йөреп тә карады. «Аурус Комендант» – люкс класслы машина булуына карамастан, махсус безнең илдә куллану шартларына туры китереп төзелгән. Куәте генә ни тора, автомобильнең двигателе 598 ат көченә ия. Компания мәгълүматларына караганда, тәүге автомобильләрне киләсе елның беренче чирегендә сата башлаячаклар. Заказларны сентябрь аенда ук җыя башлаганнар инде. Әйтүләренә караганда, яңа машинаның бәясе 33,7 миллион сумнан башланачак. Рәхәттә йөрисең килсә, түләргә дә туры киләчәк!

Рөстәм Миңнеханов Чаллыда «КАМАЗ-мастер» командасы вәкилләре белән дә очрашты. Билгеле сәбәпләр аркасында, быел спортчылар «Дакар» ярышларында катнашмый. «Бүгенге кебек катлаулы шартларда без Ватаныбыз белән бергә», – диде команда җитәкчесе Владимир Чагин. Узышта катнашмасалар да, тик утырырга вакытлары юк. Быел якташларыбыз «Дакар-2022» һәм «Ефәк юлы-2022» ралли-марафоннарында үз өстенлекләрне раслап күрсәтте инде. Ралли-рейдлар буенча Россия чемпионатында да безнекеләр беренче. Ел дәвамында спорт йөк машинасын тагын да камилләштергәннәр. Аңлашыла ки, үзебездә җитештерелүче запас частьларга өстенлек бирәләр. Яңа техниканы киләсе елның 6–15 июль көннәрендә Казан – Уфа – Магнитогорск – Оренбург – Самара – Саратов – Волгоград – Липецк – Мәскәү маршруты буенча узачак «Ефәк юлы»нда сынап караячаклар. Президент яңартылган йөк машиналарын югары бәяләде. Нинди алгарышка ирешелгәнен аңлар өчен, яңасы белән беррәттән, 1996 елда җитештерелгән йөк машинасында йөреп тә карады. «КАМАЗ»лар юлда сынатмый. Автомат тапшыру тартмасы узыш дәвамында тизлекне контрольдә тотарга ярдәм итә. Бу бик мөһим, чөнки узышта катнашучыга эш сәләтен сакларга кирәк», – диде республика башлыгы.

Президентка балалар һәм үсмерләр автоспортын үстерү юнәлешендә алып барылган эш турында да сөйләделәр. Киләсе елда, мәсәлән, Чаллы политехник көллияте базасында балалар өчен кузовсыз ярыш автомобильләре, ягъни картлар җитештерә башлаячаклар. Студентлар машина җитештерүдә башыннан алып ахырына кадәр катнашачак. Булачак белгечләргә мондый тәҗрибә артык түгел, билгеле. Табадан төшкән автомобильләрне спорт мәктәпләренә тапшырырга ниятлиләр. Шундый машиналарның берсен Рөстәм Миңнехановка да күрсәттеләр.