Луганскига ярдәм илтеп кайткан Алмаз Гыйматдинов: «Яхшыга өметләник!»

Без монда алар өчен кайгырып, борчылып, кайтмаслар, дип утырсак, егетләребез нишләр? Луганскига кадәр барып, туганы Раил Габдрахмановка машина тапшырган Алмаз Гыйматдинов шулай ди. Егетләр белән аралашып, аларның көчле рухларына сокланып кайткан алар.

Алмаз Гыйматдинов – Россия Герое исеменә лаек булган Әлки егете Раил Габдрахмановның икетуган абыйсы. Энесе белән язышып, мөмкинлек булганда, телефоннан сөйләшеп торалар.

– Сокланам мин аңа! Гадилегенә, ярдәмчеллегенә, батырлыгына сокланам. Сайлаган һөнәре үзенә туры килеп тора. Хәрби булу – тыныч тормышта да җиңел эш түгел. Бүгенге шартлар турында әйтеп тә тормыйм инде. Аннан соң, Россия Герое исемен дә теләсә кемгә бирмиләр бит. Аның бу исемгә лаек булуын белгәч, бик горурландым. Үзебезнеке бит! – дип сөйләде Алмаз.

Шулай бер сөйләшкәндә, Алмаз туганының машинасы шартлавын белгән. Раил үзе йөк машинасында йөргән.

– Җиңел машина кирәк инде сиңа, дигәч, начар булмас иде, диде ул тыйнак кына. Сорамасам, әйтмәс тә иде әле. Зарлана белми ул чөнки. Без исә туганнар белән сөйләштек тә, акча җыешып, «Шевроле-Нива» машинасын сатып алдык. Машинаны яхшылап караттык, кирәк җирен яңарттык. Шуннан соң машинаны кием-салым, инструментлар, азык-төлек ише кирәк-ярак белән шыплап тутырдык та, Раилнең әтисе Наил абый белән юлга чыктык, – ди әңгәмәдәшебез.

Луганскига ике машинада барган алар. Юл авырлыкларсыз булмый инде, ди Алмаз. Барганда да, кайтканда да кат-кат тикшерү аша узарга туры килгән.

– Аңлашыла да инде, төрле кеше булырга мөмкин бит. Луганскига килеп җитүгә, хәрби частьлары урнашкан җиргә юл тоттык. Ул көнне Раил үзе башка җирдә иде, безне дуслары каршы алды. Очраштык, таныштык, сөйләшеп утырдык. Болай сөйләгәндә, анда барып кайтуның бер куркынычы да юк шикелле тоеладыр инде. Ләкин, без килде дип, хәрби хәрәкәт туктап тормады. Без дә, үз гомеребезне куркыныч астына куюыбызны аңлап, Аллага тапшырып чыгып киттек, – дип сөйләде Алмаз Гыйматдинов.

Җыйган әйберләрен, бигрәк тә машинаны Раилнең үз кулына тапшырасы килгән аларның. Анда баруларын белгәч, ярдәм итәргә теләк белдерүчеләр яза, шалтырата башлаган.

– Кешеләрнең бердәмлеге, мәрхәмәтлелеге сокландыра. Бер дә таныш булмаганнар да әйберләр китерә башлады. Беркөнне бер апаң, шалтыратып: «Улым, сатарга дип сарымсак әзерләп куйган идем. Сез солдатлар янына барасыз икән, биреп җибәрим әле шуны? Башка берничек тә ярдәм итә алмыйм шул мин аларга», – ди. Сүзсез калдым. Чистайда яшәүче таныш егетләр дә бик тырыша, алар да махсус операциядә катнашучы якташларыбызга дип машина сатып алдылар, – ди Алмаз.

Ә солдат егетләргә килгәндә, берсе бер зарлану сүзе дә әйтмәде, ди әңгәмәдәшебез.

– Алар ил алдындагы бурычларын да, сайлаган һөнәрләренә карата җаваплылыкны да яхшы тоя. Яхшыга өмет, ышаныч та көчле аларда. Әле менә декабрьдә тагын барып кайтырга ниятлибез. Яңа ел җитә бит! Бәйрәм алдыннан күчтәнәчләр алып барып, үзенә күрә бер табын корып сөйләшеп утырырга иде. Шушы ниятебезне тормышка ашырырга насыйп булса иде, – ди Алмаз.

Монда Яңа ел кайгысы юк әле, дип зарланышканны, хәрбиләрдә бәйрәм кәефе бармы соң, дип кызыксындым.

– Соң, аларның да бәйрәм итәсе килә бит! Ә без монда алар өчен кайгырып, борчылып, кайтмаслар, дип, бәйрәм чараларыннан баш тартсак, егетләребез нишләр? Алай итеп, кәефләрен төшермик әле. Бу – минем фикер генә, билгеле. Ләкин сугыш вакытында да бәйрәмнәрдән баш тартмаганнар бит. Яхшыга өметләник! – диде Алмаз.

ВСТАВКА

Татарстаннан хәрби операция зонасына тагын ике «УАЗ» машинасы җибәрелгән. Бу изге гамәл башында Түбән Кама районы җитәкчесе Рамил Муллинның «ВКонтакте»дагы шәхси сәхифәсенә Алсу Авзалова исемле ханымның транспорт белән ярдәм итүләрен сорап язган хаты тора. Хатны аңа мобилизациягә эләккән ире язарга куша. «Аларга транспорт бик кирәк, чөнки әллә ничәшәр чакрым ераклыкка кабель ташырга туры килә, авыр бит. Мин Рамил Хамзовичның шәхси битенә мөрәҗәгать итәргә булдым һәм икенче көнне үк мәсьәләнең игътибарга алынуы турында җавап килде», – ди Алсу Авзалова үзе.

Машиналар сатып алу өчен акчаны, район башлыгы кушуы белән, хәйриячеләр, эре предприятиеләр ярдәмендә тиз генә җыеп алганнар. Бер «УАЗ»ны – «Тимер» отрядына, икенчесен мобилизацияләнгән ир-егетләргә тапшырачаклар. «Бу – бөтен Түбән Камадан, илебез һәм егетләребез язмышына битараф булмаган барлык кешеләрдән җыелган ярдәм. Без егетләребезнең исән-сау кайтуларын гына телибез. Алга таба да аларны бөтен кирәк-ярак белән тәэмин итәчәкбез», – диде Рамил Муллин.

Лилия Гыймазова