Патриотик тәрбия дәүләт символларына хөрмәттән башлана. Казан федераль университетында Президент каршындагы Геральдика советы әгъзалары белән узган очрашуда Татарстан Дәүләт Советы Рәисе Фәрит Мөхәммәтшин әнә шулай диде.
Президент каршындагы Геральдика советы оешуга быел – 20 ел. Совет әгъзалары белән очрашуда парламент башлыгы советның ТАССР төзелүнең 100 еллыгы, ислам дине кабул ителүнең 1100 еллыгы кебек әһәмиятле юбилейларны оештыруга зур өлеш кертүен билгеләп үтте.
– Өч дистә ел эчендә илебезнең Геральдика хезмәте бердәм дәүләт сәясәтен гамәлгә ашыруда шактый зур юл үтте. Сез дәүләтнең тарихи үткәненә, аның мәдәниятенә карата җәмәгатьчелек кызыксынуын арттыруга, патриотлык хисе, рәсми символларга карата ихтирамлы мөнәсәбәт формалаштырасыз, – диде ул.
Фәрит Мөхәммәтшин ассызыклаганча, рәсми символлар Россия халыкларының тарихи-мәдәни мирасын тәшкил итә.
– Советлар Союзы таркалган елларда без күпмилләтле халкыбызны берләштерү, илнең, республиканың патриотларын тәрбияли алырлык символлар барлыкка китерү турында уйландык. Иҗтимагый-сәяси тормышта геральдиканың әһәмияте бәяләп бетергесез. Символларсыз, геральдикасыз халыкны берләштерү һәм аларда ватанпәрвәрлек хисе тәрбияләү кыен булыр иде. Гражданнарның патриотик үзаңын формалаштыру нәкъ менә дәүләт символикасына хөрмәттән башлана, – диде ул.
Дәүләт Советы Рәисе әйтүенчә, флаг, герб, гимн һәрвакыт Россия дәүләте халыкларын берләштерде һәм Ватан хакына батырлыкларга илһамландырды. – Бүгенге шартларда безнең ил моңа беркайчан да булмаган кебек мохтаҗ, – диде ул.
Мәктәпләрдә һәр яңа уку атнасы ил һәм республика байракларын күтәрү һәм гимннарын җырлау белән башлануны да Фәрит Мөхәммәтшин яшьләрне патриотик тәрбияләүнең нәтиҗәле чарасы дип әйтте.
– Гимннарны җырлап, байракларны күтәреп, яшьләребезне берләштерәбез, аларның патриотик рухларын күтәрәбез. Атна башында үткәрелә торган «Мөһим сөйләшү» аша иң четерекле сораулар турында фикер алышабыз. Тарихны белү, үз илебез, республикабыз символларына хөрмәт белән карау яшьләрдә Ватанга карата мәхәббәт уята, – диде парламент башлыгы.
Очрашу ахырында Фәрит Мөхәммәтшин дәүләт бүләкләрен тапшырды. «Дуслык» ордены белән – Татарстан Президенты каршындагы Геральдика советы рәисе Рамил Хәйретдинов, «Фидакарь хезмәт өчен» медале белән Татарстан Фәннәр академиясенең Мәрҗани исемендәге Тарих институты рәисе Радик Салихов һәм башкалар бүләкләнде.
Ләйсән Сафина
АнонимАнын беткэне дэ юкТатарстанда грипп һәм коронавирус инфекциясенең кайчан көчәячәген аңлатканнар
Загрузка ...
