Бүген «Ливадия» шифаханәсендә пандемия чорында «кызыл зонада» эшләүче медицина хезмәткәрләрен реабилитацияләү буенча атналык курс тәмамлана. Республиканың төрле районнарыннан 50 медик тернәкләнү узган, нигездә, бу урта һәм кече медицина персоналы (фельдшерлар, санитарлар, дезинфекторлар, лаборантлар һәм шәфкать туташлары).
Аларның шифаханәдә булуының соңгы көнендә медиклар белән Социаль сәясәт комитеты рәисе Светлана Захарова һәм Дәүләт Советы депутаты, Татарстан Профсоюзлар федерациясе рәисе Елена Кузьмичева очрашты. Парламентарийлар медицина хезмәткәрләренә татарстанлыларның гомерен һәм сәламәтлеген саклап калуда фидакарь хезмәтләре өчен рәхмәт белдерделәр һәм киләчәктә дә эшләрендә уңышлар теләделәр.
«Пандемия башланган чорда хастаханәләргә индивидуаль яклауның өстәмә чараларын һәм бер тапкыр кулланыла торган костюмнарны китергәндә, без медицина хезмәткәрләренең зур эмоциональ һәм физик арыганлыгына игътибар иттек һәм соңыннан аларга да тернәкләндерү кирәклеген аңладык. Ул вакытта сүз ковид белән авырган кешеләрне генә тернәкләндерү турында барды, медикларга исә ял итәргә җай юк иде, — диде Светлана Захарова, — хәзер, пандемия кимүгә таба барганда, безнең коллегаларыбызга үзләренең сәламәтлеген ныгытырга, ял итәргә, профилактик процедуралар алырга мөмкинлек барлыкка килде».
Дәүләт Советы утырышларының берсендә Социаль сәясәт комитеты рәисе Светлана Захарова депутатларга һәм чарада катнашучыларга шушы максатларга акча җыя башлау тәкъдиме белән мөрәҗәгать итте. Күпләр, шул исәптән, үз вакытында бу табибларның һәм шәфкать туташларының пациентлары булган татарстанлылар да, тәкъдимне күтәреп алды. «Рәхмәт, доктор!» акциясе шулай барлыкка килде, һәм аны гамәлгә ашыру өчен кирәкле акчалар җыелды.
Проектны Дәүләт Советы депутат-хатын-кызларының «Мәрхәмәт – Милосердие» берләшмәсе, «Бердәм Россия» партиясенең төбәк бүлеге һәм республика Профсоюзлар федерациясе хуплады. Проект гамәлгә ашырылган ике ел эчендә йөзгә якын табиб һәм медицина хезмәткәре үз сәламәтлеген ныгытты.
«Рәхмәт, доктор! — бик яхшы проект, без аны гамәлгә 2020 нче елда гамәлгә ашыра башладык, — дип билгеләп үтте Елена Кузьмичева, — безнең табибларга һәм медицина хезмәткәрләренә «таякның юан башы төште» – алар озак вакытлар дәвамында үз якыннары белән дә күрешмичә «кызыл зоналарда» эшләделәр. Без бу проектны күпләрнең хуплавын күрәбез, табиблар үзләренә сәламәтләнү һәм ял итү мөмкинлеге тудырылганга бик рәхмәтле».
Ике ел элек Татарстанның биш профсоюз сәламәтлек саклау оешмасы («Васильевский», «Ливадия», «Бәкер», «Шифалы Су — Ижминводы» һәм «Жемчужина») кунакчыл төстә 65 яшьтән өлкәнрәк кырык дүрт медицина хезмәткәрен кабул итте. Үзләре дә куркыныч аеруча янаган яшьтә булуга карамастан, билгеле булганча, 65 яшьлек һәм аннан өлкәнрәк кешеләр өчен ковид аеруча куркыныч, алар барысы да үз постында калганнар һәм эшләүләрен дәвам иткәннәр.
Быел профилактик дәвалау «Ливадия» шифаханәсендә оештырылган. «Ливадия-Татарстан» шифаханәсе директоры Ленар Мөхәммәтҗанов билгеләп үткәнчә, хастаханәдә Covid-19 кичергән кешеләрне реабилитацияләү һәм авыру нәтиҗәләрне бетерү буенча махсус программа эшләнгән, аңа, аерым алганда, сулыш гимнастикасы, дәвалау физкультурасы, скандинавия йөреше, массаж, тоз камерасы, мунча комплексы белән су процедуралары, психолог ярдәме керә. Моннан тыш, һәр медицина хезмәткәре өчен индивидуаль тернәкләндерү программасы эшләнгән.
«Без барлык медицина хезмәткәрләренә, табибларга гына түгел, урта һәм кече медицина персоналына да игътибар итәргә тырышабыз, — дип басым ясады Светлана Захарова, — әйе, табибларга күп нәрсә бәйле, әмма, кагыйдә буларак, пациентлар янында тәүлек буе шәфкать туташлары һәм санитаркалар була. Алар кешеләр тизрәк терелсен, пандемия тизрәк бетсен өчен бик күп нәрсә эшләделәр».
Тернәкләндерүнең атналык курсыннан тыш, табибларга һәм аларның гаилә әгъзаларына республика шифаханәләрендә шулай ук «ял көне турлары» да оештырылган, алар кысаларында ял итү һәм дәвалау каралган. Елена Кузьмичева билгеләп үткәнчә, гаиләсе белән бергә ял итү мөмкинлегеннән Татарстанның 1 меңнән артык табибы файдаланган.
