Татарстанда 101 судья җитми. Республика судьялары киңәшмәсендә шул хакта хәбәр иттеләр. Судьялар узган елга хисап тотты. Чара Татарстан Президенты Рөстәм Миңнеханов катнашында узды.
2022 елның бер тармак өчен дә җиңелләрдән булмавы сер түгел. Республика Президенты әйтүенчә, былтыр хокук белән эш иткән органнарга да эш күп булды. Әйтик, хәрби комиссариат һәм чакырылыш комиссияләре эшчәнлеге белән бәйле эшләрне кыска вакыт эчендә карарга, гражданнарның хокукларын сакларга.
Рөстәм Миңнеханов, ришвәтчелеккә бәйле җинаятьләр саны да борчый, ди. «Гаепле кешеләр закон нигезендә җавап бирергә тиеш. Алар үз гамәлләре белән дәүләткә матди зыян гына салмый, абруен да киметә. Дәүләт органнары мондый хокук бозуларны бетерү өчен уртак көч куярга тиеш. Шул ук вакытта коррупция фактларын булдырмауның барлык алымнарын кулланырга кирәк», – диде Рөстәм Миңнеханов.
Татарстан Президенты искәрткәнчә, 2014 елдан башлап республикада җәмәгать юстициясен үстерү максатларында махсус программалы юнәлеш кулланыла. Соңгы 3 елда Татарстан бюджетыннан дәүләт программасы чараларын гамәлгә ашыруга 1,8 млрд сумнан артык акча бүлеп бирелгән. Акча хезмәт хакы, ремонт, матди-техник тәэмин итү кебек сорауларны хәл итүгә тотыла.
Татарстан Югары Суды рәисе Илгиз Гыйләҗев хисабыннан аңлашылганча, былтыр судларда 1 млн 135 меңләп эш һәм материал каралган. Җинаять эшләренең 6 процентка кимүенә ирешелгән (114 меңгә калган). Ел дәвамында 14 мең кешене хөкем иткәннәр. Ә акланучылар күрсәткече – 5 мең кеше (20 процент).
Әмма кадрлар кытлыгы мәсьәләсе кала бирә. Рәис сүзләренчә, хәзер республикада 101 судья җитми.
Рөстәм Миңнеханов әйтүенчә, судлар каршында бик җитди бурычлар тора. «Мин ышанам: бердәм коллектив бу бурычларны уңышлы гына башкарып чыгар», – диде ул.
